Россия президенти Владимир Путин Франция давлат раҳбари Эммануэль Макрон билан суҳбатда россиялик сиёсатчи Александр Навальнийнинг ўзи номаълум сабабларга кўра «Новичок» гуруҳига мансуб заҳарни ичган бўлиши мумкинлигини тахмин қилди. Бу ҳақда Le Monde газетаси ўз манбаларига таянган ҳолда хабар тарқатди. Нашр айнан қайси манбадан ушбу ахборотни олганига аниқлик киритмаган.
Эммануэль Макрон суҳбат чоғида Навальнийнинг ўзи асаб тизимига таъсир кўрсатиб, инсонни узоқ вақт беҳуш қилувчи «Новичок» гуруҳига кирувчи заҳарни ичган бўлиши мумкинлиги ҳақидаги ушбу тахминни инкор қилган.
Путин ҳамда Макрон ўртасидаги телефон суҳбати 14 сентябрда Франция томонининг ташаббуси билан ўтказилган. Le Monde нашрининг ёзишича, суҳбат чоғида Россия президенти Навальнийни «интернетдаги қитмирлардан бири» деб атаган ва мухолифат вакили тузган Коррупцияга қарши жамғарманинг депутат ҳамда амалдорларни шантаж қилгани ҳақида гапирган.
Шунингдек, Путин «Новичок» аввал қайд этилганидан кўра анча мураккаб тузилишга эгалиги хусусида ҳам маълумот берган. Россия давлат раҳбари Навальний билан содир бўлган воқеа Латвияда яшайдиган «Новичок»ни ишлаб чиққан олимлардан бири билан боғлиқлиги юзасидан текшириш ўтказиш кераклигини айтган (Путин ким ҳақида гапиргани маълум эмас). Макрон эса Латвия версиясининг ҳақиқатдан йироқ эканини билдирган.
Суҳбатда Макрон Путинга франциялик мутахассислар ҳам Навальнийга «Новичок» гуруҳига кирувчи заҳарли модда билан суиқасд уюштирилганини тасдиқлаганини айтган.Аввал Германия ҳукумати ҳам Алексей Навальний Россияда «Новичок» турига кирувчи модда билан заҳарланганини билдирган. У икки ҳафтадан ортиқ вақт давомида комада ётган, 10 сентябрь куни Навальний заҳарланганидан сўнг тўлиқ ўзига келган ва 15 сентябрда тузала бошлаганидан кейин илк бор Instagram’да пост қолдирган, сиёсатчи 19 сентябрда тикланиш жараёни қандай кетаётгани ҳақида гапириб берган.
Германия Навальнийнинг заҳарланишига оид маълумотларни Кимёвий қуролни тақиқлаш ташкилотига юборган. Россия ҳукумати дастлаб Омскдаги касалхонада сиёсатчидан олинган тестлар организмда заҳар борлигини кўрсатмаганини таъкидлаганди.
Изоҳ (0)