Хитой коронавирусга қарши АҚШнинг барча айбловларини рад этади, улар асоссиздир, деган Хитойнинг БМТдаги доимий вакили Чжан Цзюнь АҚШ президенти Дональд Трампнинг БМТ Бош ассамблеяси сессиясидаги нутқига жавобан. Бу ҳақда Reuters хабар бермоқда.
Трамп Хитой ва ЖССТни вирус одамдан одамга юқмаслиги ва касаллик аломатлари бўлмаган одамлар вирус юқтирмаслиги тўғрисида нотўғри баёнотлар беришда айблаганди. У, шунингдек, БМТни коронавирус тарқалиши учун Хитойни жавобгарликка тортишга чақирганди.
«Бизда бир томонлама ёндашув, зулм қилиш амалиёти билан боғлиқ муаммолар мавжуд. Дунё аросатда. Айни пайтда дунё кўпроқ ҳамжиҳатлик ва ҳамкорликка муҳтож, қарама-қаршиликка эмас. Биз ўзаро ишончни оширишимиз керак, сиёсий вирус тарқалишини эмас», — деган Чжан Цзюнь.
«Хитой ХХРга қарши қаратилган асоссиз айбловларни қатъиян рад этади, бу айбловлар мутлақо асоссиз. Бошқалар нима дейишидан қатъи назар, Хитой кўп қиррали ёндашувни ва БМТнинг халқаро масалалардаги марказий ролини қўллаб-қувватлайди», — деб таъкидлаган у.
БМТ Бош ассамблеяси сессиясининг юқори даражадаги ҳафтаси илк бор ярим виртуал форматда ўтказилмоқда. Раҳбарларнинг чиқишлари коронавирус пандемияси хавфидан келиб чиқиб, онлайн тарзда тарқатилмоқда. Давлатларнинг штаб-квартирадаги доимий вакиллари ўз раҳбарлари номидан чиқишларни жонли эфирда овоз чиқариб эълон қилиш ва нутқларини кириш сўзи билан бошлаш ҳуқуқига эга.
БМТ бош қароргоҳи жойлашган Нью-Йорк штати дастлабки пайтларданоқ АҚШда пандемия маркази бўлиб келди. Энг ёмон пайтларда кунига 700 дан ортиқ одам вафот этган. Шундай эпидемиологик вазиятда ҳар йили бўлиб ўтадиган юқори даражадаги БМТ Бош ассамблеяси ҳафталиги сентябрь ойида одатий форматда ўтмаслиги аниқ эди.
Эслатиб ўтамиз, янги коронавирус 2019 йилда Хитойда қайд этилганди. Кейинчалик у бошқа давлатларга тарқалган. ЖССТ 11 март куни уни пандемия деб эълон қилди. Сўнгги маълумотларга кўра, дунё бўйлаб коронавирусга чалинганлар сони 31 миллион кишидан ошган. Касалликлар сони бўйича рўйхатда ҳали ҳамон АҚШ етакчилик қилмоқда.
Изоҳ (0)