Россия президент Владимир Путин дунё иқтисодиётини «легитим бўлмаган санкциялардан» озод қилишга чақирди. У бу ҳақда 22 сентябрь куни БМТ бош ассамблеясидаги нутқи давомида гапирган.
Путин БМТ бош ассамблеясида 2015 йилдан бери илк бора нутқ сўзламоқда.
Шунингдек, Путин жаҳон иқтисодиётининг коронавирус инқирозидан кейин ўзига келишига узоқ вақт талаб этилиши ва ишсизлик даражаси кескин ўсиши мумкинлигини тахмин қилган. Россия президенти ноқонуний санкцияларни бекор қилиш лозимлигини қайд этган, бироқ мазкур чекловларнинг кимларга нисбатан ва нима учун қўлланилганини аниқлик киритмаган.
Путин мамлакатлар ўртасида бирдамлик йўқлиги ўзаро муносабатлар чигаллигини ҳам алоҳида таъкидлаган. «Соғлиқни сақлаш тизимида ҳам иқтисодиётдаги каби чекловларни бекор қилиш зарур», – деган Путин.
Россия президенти мамлакатнинг соғлиқни сақлаш соҳасида, хусусан коронавирус инфекциясига қарши курашда кўплаб давлатларга ёрдам бераётганини эътироф қилган.
«Россиялик шифокорлар тўплаган билим ҳамда клиник малака «Спутник V» вакцинасини биринчи бўлиб ишлаб чиқиш ва рўйхатдан ўтказишга кўмак берди. Вакцина ишончли, хавфсиз ва самарали», – дея таъкидлаган Путин.
Путин БМТ тизимида ишловчи ходимларга Россия вакцинасини беғараз етказиб беришни таклиф қилган. «Россия БМТга зарур ёрдамни беришга ва ташкилот ходимларини элаш учун вакцинани беғараз етказиб беришга тайёр», – дея қўшимча қилган у.
Бундан ташқари, Путин коинотда қуролларни синашни тўхтатиш ва стратегик ҳужум қуролларини чеклаш борасидаги келишувни қайта тиклашни ҳам таклиф этган. Унинг фикрича, АҚШ мазкур битим шартларининг бузилишида асосий айбдорлардан бири. Россия «коинотга қурол чиқариш бўйича юридик мажбуриятлар юклайдиган халқаро ҳужжат» имзолаш ташаббусини билдиради.
Россия президент нутқи сўнгида коронавирус пандемияси якунланганидан кейин БМТ хавфсизлик кенгашига аъзо беш мамлакат вакиллари билан учрашув ўтказиш ҳамда хавфсизлик борасида умумий келишув имзолашни ваъда қилди. Путин БМТ ва ташкилот ҳузуридаги хавфсизлик кенгашининг фаолиятига ижобий баҳо берди. Хавфсизлик кенгашининг Иккинчи жаҳон урушида ғолиб чиққан ядро қуролига эга беш давлатларга нисбатан вето қўйганини олқишлади. Хавфсизлик кенгашидаги вето ҳуқуқи низоларнинг олдини олишда қўл келишини қайд этди.
Эслатиб ўтамиз, аввалроқ АҚШ президенти Дональд Трамп БМТдан Хитойга нисбатан санкциялар қўллашни сўраганди. АҚШ етакчиси коронавирус инфекциясининг бутун дунёга тарқалиб кетишида Хитойни айблаган. У БМТ бош ассамблеяси вақтида ҳам ушбу фикрини ўзгартирмаяпти.
Изоҳ (0)