Россия Соғлиқни сақлаш вазирлиги М.П. Чумаков номидаги Иммунобиологик препаратларни ишлаб чиқиш ва тадқиқ этиш федерал илмий маркази томонидан ишлаб чиқилган коронавирусга қарши вакцинанинг клиник синовларини ўтказишга рухсат берди. Бу ҳақда марказ маълумотларига таяниб, «РБК» хабар бермоқда.
Қайд этилишича, ушбу вакцинада юқумли касалликлар келтириб чиқара олмайдиган сусайтирилган ёки йўқ қилинган, яъни инактивацияланган вируслардан фойдаланилади.
Янги вакцина синовлари тез орада бошланади ва Киров, Санкт-Петербург, Новосибирскда ўтказилади. Уларда уч мингдан ортиқ кўнгиллилар иштирок этади. Чумаков марказида таъкидланишича, у «Жаҳон соғлиқни сақлаш ташкилотининг талабларига мувофиқ амалга оширилади ва тадқиқотларнинг ишончи илмий маълумотлар билан таъминлаш имконини беради».
Эмлашдан сўнг кўнгиллилар касалхонада 16 кун давомида изоляция қилинади, уларнинг аҳволи шифокорлар томонидан назорат қилинади. Марказ бош директори Айдар Ишмуҳаметовнинг сўзларига кўра, тадқиқотни ноябрь ойида якунлаш режалаштирилган.
Айни пайтда Россияда коронавирусга қарши фақат битта вакцина рўйхатдан ўтган — Гамалея номидаги марказнинг «Sputnik V» вакцинаси. У август ойида клиник синовлар тугашидан олдин рўйхатдан ўтказилган. Давлат вирусология ва биотехнология илмий-тадқиқот марказининг иккинчи маҳаллий «Вектор» вакцинаси ҳам синов босқичида.
«Вектор»дан ташқари Россияда иккита чет эл вакцинаси: Хитойнинг Синофарми ва Британия—Швециянинг AstraZeneca компанияси томонидан яратилган вакцина рўйхатдан ўтказишга тайёрланмоқда. АҚШда 9 сентябрь куни AstraZeneca фармацевтика компанияси вакцинанинг учинчи фаза синовларини тўхтатиб қўйган, бунга беморлардан бирида иккиламчи таъсир пайдо бўлгани сабаб бўлганди. Орадан бир неча кун ўтиб синовлар яна давом эттирилган.
Изоҳ (0)