Ёш болалар коронавируснинг оғир шакли билан касалланиши ва вафот этишига қандай омиллар сабаб бўляпти? Ўзбекистонлик мутахассис жавоби

Ўзбекистон Соғлиқни сақлаш вазирлиги 17 сентябрь куни Бўстонлиқ туманида яшаган, коронавирусга чалинган 11 ёшли М.Ў. вафот этгани ҳақида хабар берган эди. Унда М.Ў.нинг 2012 йилдан бери ногиронлиги бўлиб, «Сурункали гломерулонефрит, нефротик шакли, гематурик синдром. Камқонлик 3-даража. Семизлик 3-даража. Сурункали буйрак етишмовчилиги» ташхиси билан Бўстонлик тумани кўп тармоқли Марказий поликлиникаси умумий амалиёт шифокори томонидан назоратга олингани айтилган эди.

Коронавирусга қарши кураш штаби аъзоси Барно Абдусаматова АОКА залида ўтказилган брифингда ушбу масалада аҳолидан келган «Короновирусдан вафот этган 11 ёшли бола мактабга борганми? Болаларда касаллик енгил кечади, деб кўп  марта айтилган эди. Нима учун бу бола вафот этди?», деган саволига аниқлик киритди.

Мутахассис коронавирус болаларда аксарият ҳолларда енгил шаклдаги ЎРВИ сингари томоқ оғриғи, йўтал, бурун оқиши ва аксириш билан кечиши, лекин сурункали касалликларнинг қўзғалиш даврида коронавирус инфекцияси юқтирилса, иккала касаллик натижасида оғир кечиш ҳолатлари кузатилишини бир неча марта таъкидлаб ўтганини билдирган. 11 ёшли марҳум беморда ҳам асосий касалликлари ҳисобига COVID-19 оғир кечганлигини таъкидлаган. Шунинг учун ота-оналар болаларда сурункали касалликлари бўлса, ҳудудий шифокорлари билан мунтазам алоқани сақлаши ва  ўз вақтида диспансер кўригидан ўтиб даво муолажаларини олиб туриши шартлигини айтган. Болаларда ҳам касаллик ўтказиб юборилса, шифокорга кеч мурожаат қилинса, нафас олиш тизими ва бошқа аъзоларнинг сурункали касалликлари мавжуд бўлса, коронавирус оғир кечиш ҳолатлари кузатилиши ҳамда ўлимга ҳам олиб келиши мумкинлиги қўшимча қилинган.

Бўстонлиқ тумани Ғазалкент шаҳрида истиқомат қилган 11 ёшли бемор 5 сентябрь куни эрталаб соат 08:00 да туман тиббиёт бирлашмаси қабул бўлимига тез тиббий ёрдам машинасида олиб келинган. Маълумки, 5 сентябрь куни ҳали мактаблар ўз фаолиятини бошламаган эди. Шунинг учун бола мактабга ҳали бормаган. Туман тиббиёт бирлашмасига олиб келинганида, болада бурундан қон кетиши, тана ҳароратининг 38 даражага кўтарилиши, нафас сиқиши кузатилган. Кўкрак қафаси рентгени қилинганда 50 фоиз зарарланиш аниқланган. Бола 2012 йилдан буён сурункали гломерулонефрит, нефротик шакли, сурункали буйрак етишмовчилиги, камқонлик ва семизликнинг учинчи даражаси ташхиси билан диспансер назоратида турган ва ногиронлик нафақаси олиб келган. Тошкент тиббиёт академиясининг болалар нефрология бўлимида юқоридаги ташхис билан йилига икки марта стационар шароитда даволаниб турган. Сўнгги бор 2020 йил 11–20 июлда Чирчиқ шаҳридаги Тошкент вилояти болалар кўп тармоқли тиббиёт марказининг нефрология бўлимида даволанган. Бемор Бўстонлиқ туман тиббиёт бирлашмасида инфекционист, реаниматолог, педиатр шифокорлари томонидан консилиум қилинган ва унга коронавирус ташхиси қўйилиб, тезкор тартибда Чирчиқ шаҳридаги шу соҳага ихтисослашган шифохонага келтирилган. Кўрилган даво чораларига қарамасдан, бемор сурункали гломерулонефрит, буйрак етишмовчилининг терминал босқичи, семизлик ва анемиянинг учинчи даражаси, икки томонлама пневмониянинг оғир шакли натижасида вафот этган.

Барно Абдусаматова, Коронавирусга қарши кураш штаби аъзоси 

Эслатиб ўтамиз, Республика махсус комиссияси ва Коронавирусга қарши кураш штаби аъзоси Нурмат Отабеков АОКА ҳузурида ташкил этилган брифингда Ўзбекистонда ёш болалар орасида коронавирус касаллиги сони кўпайиши натижасида кўплаб болалар ўлиб кетаётгани хусусидаги гаплар ҳақиқатдан йироқлигини билдирган.  Аввалроқ Барно Абдусаматова Ўзбекистонда шу кунгача коронавирусга чалинганларнинг 3 932 нафари болалар бўлиб, улар орасида ўлим ҳолатлари қайд этилмагани, болалар орасида касаллик 7-18 ёшгача бўлганларда кўп учраётгани, умумий касалланиш кўрсаткичининг 55 фоизини болалар ташкил этишини айтган.