Ички ишлар вазирининг ўғли Бобохон Бобожонов «Қишлоқ қурилиш банк» бошқарув раиси ўринбосари этиб тайинланди

АТБ «Қишлоқ қурилиш банк» Кузатув кенгашининг тегишли қарорига асосан банк бошқаруви раисига янги ўринбосарлар тайинланди. Бу ҳақда банк ахборот хизмати хабар берди.

Унга кўра, Бобохон Бобожонов АТБ «Қишлоқ қурилиш банк» бошқаруви раиси ўринбосари этиб тайинланди.

Бобохон Бобожонов бунга қадар Ўзбекистон Марказий банки ва АТБ «Қишлоқ қурилиш банк» тизимида турли лавозимларда ҳамда Тошкент давлат юридик университетининг молия-иқтисод ишлари бўйича проректори вазифасида фаолият юритган.

«Xabar.uz» нашрининг ёзишича, Бобохон Бобожонов Ўзбекистон ички ишлар вазири генерал-лейтенант Пўлат Бобожоновнинг ўғли.

Шунингдек, Санжар Олимжонов АТБ «Қишлоқ қурилиш банк» бошқаруви раиси ўринбосари этиб тайинланди.

Санжар Олимжонов шу кунга қадар АИТБ «Ипак йўли» Ғазначилик бошқармаси бошлиғи лавозимида ишлаб келаётган эди.