Луис Суарес фирибгарлик йўли билан Италия фуқаролигини олишга ҳаракат қилгани маълум бўлди

«Барселона» ҳужумчиси Луис Суарес ноқонуний йўллар билан Италия фуқаролигини олишга ҳаракат қилган, дея хабар бермоқда La Repubblica.

Футболчи италян тилидан имтиҳон топшириши керак эди. Манбада айтилишича, уругвайлик футболчи тест мавзуларини имтиҳон бошланишидан олдин билган. Синовдан муваффақиятли ўтиш учун Суаресга жавоблар олдиндан юборилган. Гумонланувчилар орасида Перужия чет элликлар университети ректори Жулиана Грего Болли ва университет бош директори Симоне Оливьери борлиги айтилмоқда.

Суарес бу ишда бош айбдор деб ҳисобланмаяпти. Таъкидланишича, ҳозирда университетда текширув ишлари олиб борилмоқда.

Қайд этиш жоиз, «Барселона» ҳужумчиси «Ювентус»га ўтиши мумкинлиги ҳақида хабарлар тарқалганди, бироқ кейинроқ туринликлар спорт директори клуб уругвайлик футболчи билан шартнома имзоламаслиги ҳақида баёнот билан чиқди.

Сўнгги хабарларга кўра, Суарес тез орада «Атлетико» билан шартнома имзолайди.