АҚШ президенти Дональд Трамп Эронга қурол етказиб бериш ёки ундан қурол сотиб олишга алоқадор мамлакатлар, компаниялар ва шахсларга нисбатан санкция жорий этишни кўзда тутувчи фармонни имзолади. Бу ҳақда Meduza хабар берди.
Трампнинг баёнотида айтилишича, АҚШ Эронга ядро қуролига эга бўлишига имкон бермайди ва мазкур мамлакат баллистик ракеталар ва оддий қуроллар етказиб бериш орқали қолган дунё мамлакатларини хавф остида қолдиришини истамайди.
АҚШ президентининг сўзларига кўра, бу фармон БМТнинг Эронга қарши санкцияларини қайта тиклайди ва Эроннинг ядро, ракета ва оддий қуролларини қўллаб-қувватлайдиган 20 дан ортиқ ташкилот ва шахсга нисбатан янги санкциялар ва экспорт назоратини жорий қилади.
АҚШ президентининг миллий хавфсизлик бўйича маслаҳатчиси Роберт O’Брайеннинг маълум қилишича, Трампнинг фармони Эронга оддий қуроллар етказиб бериш, сотиш ва ташиш бўйича ёрдам берадиган мамлакатлар, корпорациялар ва шахсларга нисбатан иқтисодий санкциялар қўллаш имконини беради. АҚШ санкциялар остига тушадиган одамлар ва ташкилотларнинг АҚШдаги активларини блоклаб қўйишни режалаштирмоқда.
БМТ 18 октябрь куни Эронга оддий қуроллар сотиш бўйича тақиқни олиб ташлаши кутилмоқда. АҚШ ҳукуматининг фикрича, БМТнинг тақиқни узайтиришдан бош тортиши бутун Яқин Шарққа хавф солади.
БМТ бош котиби Антониу Гутерриш ва БМТ Хавфсизлик кенгашининг кўплаб аъзолари, жумладан, Европа мамлакатлари АҚШда БМТнинг санкциялари киритилиши ҳақида бир томонлама эълон қилиш бўйича юридик ваколат йўқлигини маълум қилган.
Изоҳ (0)