Европа иттифоқига аъзо мамлакатларнинг ташқи ишлар вазирлари Беларусга қарши санкциялар қўллаш борасида бир тўхтамга кела олмади, шу сабабли мазкур масала давлатлар ва ҳукуматлар раҳбарлари иштирокида яна муҳокама қилинади. Бу ҳақда Европа иттифоқи дипломатияси раҳбари Жозеп Боррель маълум қилди, деб ёзмоқда «Интерфакс».
«Вазирлар Беларусга қарши санкциялар қўллаш масаласини муҳокама қилди. Гарчи бу борада барчада хоҳиш мавжуд бўлса ҳам, айни вақтда ушбу ишни қилиш имконсиз, сабаби бу борада барча бир қарорни қўллаб-қувватлаши талаб этилади. Бугун ҳамманинг гапи бир ердан чиққани йўқ», – деган Боррель матбуот анжумани вақтида.
«Ушбу масала давлат ва ҳукуматлар раҳбарлари томонидан шу ҳафта давомида Еврокенгашда муҳокама қилинади», – дея қўшимча қилган у.
Мавзуга доир: Александр Лукашенко Литва ва Польша билан чегаралар ёпилишини, Украина билан эса чегара кучайтирилишини маълум қилди
«Биз бирдамлик билан қарор қабул қилишимиз керак, аммо бунинг учун битта давлатнинг розилиги етишмаяпти ва ушбу мамлакат – Кипр. Кипр Беларусга нисбатан санкциялар қўлланилишига қарши эмас, лекин улар бир вақтнинг ўзида Туркияга нисбатан ҳам чоралар кўриш зарур деб ҳисобламоқда», – деган Боррель.
Аввал сентябрь бошида Bloomberg агентлиги Кипрнинг Евроиттифоқдаги ҳамкасбларини Беларусдан ташқари Ўрта Ер денгизи шарқидаги бурғилаш ишлари туфайли Туркияга нисбатан ҳам санкциялар қўллаш лозимлиги ҳақида огоҳлантирганини хабар қилганди.
Агентлик Кипрнинг июнь ойида ҳам ЕИ санкциялари рўйхатига Туркиянинг еттита компаниясини киритишни таклиф этганини ҳам эслатган.
«Евроиттифоқ давлатлари ташқи ишлар вазирларининг кейинги кенгашигача санкциялар қўллаш борасида бир қарорга келинишига бор кучимни сафарбар қилишга тайёрман», – деган Боррель Брюсселдаги матбуот анжуманида. Боррель бу ишни Европа иттифоқининг обрўси учун ҳам амалга ошириш зарур эканини алоҳида таъкидлаган.
У ҳафта охирида давлат ва ҳукуматлар раҳбарларининг муҳокамасидан кейин Евроиттифоқда санкцияларни қўллаш масаласи якуний нуқтага яқинлашишини билдирган.
Лукашенкога қарши санкцияларБоррелнинг айтишича, ЕИ давлатлари Беларусь президенти Александр Лукашенкога нисбатан санкциялар қўллаш борасида ягона қарорга келмаган. Унинг сўзларига кўра, масала ҳали ҳам муҳокама қилинмоқда.
Боррель айрим мамлакатлар ушбу қарор қабул қилинадиган вақт келганини билдираётгани, бошқалар эса стратегик нуқтаи назардан мазкур босқичда бундай қарор чиқармаслик лозимлигини қайд этганини айтиб ўтган.
Беларусда 9 августда бўлиб ўтган президентлик сайловларида қайд этилган натижаларга қарши халқнинг норозилик намойишлари давом этмоқда. Сайловларда 1994 йилдан буён мамлакатни бошқариб келаётган Александр Лукашенко ғолиб деб топилган.
Изоҳ (0)