Туркманистондаги мактабларда ўқув вақтининг қисқартирилиши сабабли бошланғич синфларда жисмоний тарбия, мусиқа, меҳнат ва расм дарслари бекор қилинди. Бу ҳақда «Хроника Туркменистана» хабар берди.
Катта синфларда эса ўқув дастурига киритилган олти соат туркман тили ўрнига тўрт соат, уч соат рус тили ўрнига икки соат, икки соат биология, тарих ва география дарслари ўрнига бир соатдан дарс ўтилмоқда.
Коронавирус пандемияси шароитида кўплаб мамлакатлардаги мактабларда дарслар қисқартирилган дастурлар асосида ўтилмоқда. Бироқ Туркманистонда таълим соатларини ва фанлар сонини қисқартириш бўйича расмий топшириқ йўқ, шунинг учун ўқитувчилар дарслар худди аввалги меъёрларда ўтаётганидек журналларни ва иш дафтарларини тўлдиришга мажбур қилинмоқда.
Шунингдек, қўйилган баҳолар ҳам аввалги дарс соатлари ва фанлар сонига мос келиши керак. Шунинг учун туркманистонлик ўқитувчилар нафақат сохта маълумотларни кўрсатишга, балки ўйлаб топилган баҳоларни ҳам қўйишга мажбур бўлмоқда.
Эслатиб ўтамиз, Туркманистон мактабларида ҳар бир синфдаги ўқувчилар сони 15 нафаргача, дарслар давомийлиги эса 25-35 дақиқагача қисқартирилганди.
Аввалроқ Ашхободда рус тилида таълим бериладиган синфлар санитария-гигиена меъёрларига амал қилиш зарурати сабабли ёпилгани муносабати билан Россия Ташқи ишлар вазирлиги мамлакатда рус тили синфларининг ёпилиши билан боғлиқ вазиятни тушунтиришни сўраб, Туркманистон Ташқи ишлар вазирлигига нота юборгани ҳақида хабар берилганди.
Изоҳ (0)