Месси «Барселона»дан кетаётган Видаль билан ўзгача хайрлашди ва ўзи ҳам клубдан кетишига шама қилди

«Барселона» сардори Лионель Месси жамоани тарк этиб, «Интер» сафига ўтаётган ярим ҳимоячи Артуро Видаль билан Instagram саҳифаси орқали хайрлашди.

«Бир-биримизга қарши ўйнаган вақтларимидагина сени билганман. Сен менга доим феномен бўлиб кўрингансан. Кейин эса шахсан танишдик. Мени яна ҳам кўпроқ ҳайратга солдинг. Бирга ўтган икки йил давомида кўплаб нарсаларни бирга бўлишдик. Сен жамоада ўз изингни қолдирдинг. Жамоа сени соғиниб қолади, Артуро. Янги клубда ва фаолиятингнинг янги босқичида сенга энг яхшиларини тилаб қоламан. Сен билан йўлларимиз яна кесишади, бунга аминман», — дея ёзади Месси.

Видаль ҳам Мессига жавоб қайтарди: «Катта раҳмат, ўзга сайёралик. Тарихдаги энг зўри билан битта жамоада ўйнаганимдан фахрланаман. Дўстлик учун ҳам миннатдорман. Соғиниб қоламан. Кўришамиз».

Сўнгги маълумотларга кўра, 33 ёшли Видаль «Интер» билан 2+1 кўринишида шартнома имзолайди. Яъни Артуро икки мавсумдан сўнг шартномасини яна бир йилга узайтириши мумкин бўлади. Чилилик футболчи миланликлар сафида йилига бонуслар билан қўшганда 6 миллион евро маош олади.

Эслатиб ўтамиз, Месси ёзги трансферлар вақтида «Барселона» билан шартномани ўзаро келишув асосида бекор қилишни хоҳлади. Аммо Бартомеу Месси клубни тарк этиши учун 700 миллион евро тўланиши кераклигини қайд этиб, шартнома бекор қилинишига рухсат бермади. Лео эса клуб билан судлашиш нияти йўқлигини эълон қилиб, Каталонияда қолишини айтди.

• Лионель Мессининг жарима майдони ташқарисидан урган топ-10 голи (видео)
• Лионель Мессининг «Реал» дарвозасига «Камп Ноу»да урган 10 та голи (видео)