Ўзини «Новичок» асосчиларидан бири деб айтган кимёгар Вил Мирзаянов «Дожд» телеканали эфирида заҳарловчи модда учун Алексей Навальнийдан узр сўради. Бу ҳақда Meduza хабар бермоқда.
«Мен ушбу жиноий иш — Навальнийни заҳарлашда фойдаланилган моддани ишлаб чиқишда иштирок этганим учун ундан узр сўрайман», — деган 1996 йилдан буён АҚШда яшовчи кимёгар.
Мирзаяновнинг сўзларига кўра, у 1993 йилда «Новичок»дан заҳарланишни бошдан ўтказган одам билан учрашган. У тасвирланган заҳарланиш симптомлари 19 сентябрда Навальний таърифлаган симптомларга ўхшайди.
«Новичок» асосчиларидан бири деб аташган яна бир кимёгар Леонид Ринкнинг «РИА Новости»га билдиришича, Мирзаяновнинг «Новичок» ишлаб чиқилишига ҳеч қандай алоқаси йўқ: «Унинг биокимёга ҳам, бошқасига ҳам ҳеч қандай алоқаси йўқ. Оддий хроматографист».
Шунингдек, Навальнийдаги заҳарланиш симптомлари «Новичок»никига ўхшамаслигини, унинг тирик қолгани ҳам «Новичок» таъсирига зидлигини айтган ва Мирзаянов кимнингдир буюртмасига кўра баёнот берган деб тахмин қилган.
Германия ҳукумати маълумотларига кўра, Алексей Навальний Россияда «Новичок» турига кирувчи модда билан заҳарланган. У икки ҳафтадан ортиқ вақт давомида комада ётди, 10 сентябрь куни Навальний заҳарланганидан сўнг тўлиқ ўзига келди. 15 сентябрда заҳарланганидан сўнг илк бор Instagram’да пост қолдирди, 19 сентябрда тикланиш жараёни қандай кетаётганини айтиб берди.
Германия Навальнийнинг заҳарланишига оид маълумотларни Кимёвий қуролни тақиқлаш ташкилотига юборган. Россия ҳукумати дастлаб Омскдаги касалхонада сиёсатчидан олинган тестлар заҳар борлигини кўрсатмаганини қатъий таъкидламоқда.
Изоҳ (0)