Покистонлик инсон ҳуқуқлари фаоли Малала Юсуфзай 18 сентябрь куни Барқарор ривожланиш мақсадлари қабул қилинганлигининг беш йиллигига бағишланган тадбирда БМТга аъзо давлатларга мурожаат қилди. Фаолнинг таъкидлашича, у университетни эндигина тугатган ва дунё раҳбарларига беш йил олдин барчага таълим бериш ҳақидаги ваъдаларини эслатган, дея хабар беради БМТнинг Янгиликлар маркази.
«БМТга аъзо давлатлар Барқарор ривожланиш мақсадларини қабул қилганларидан бери беш йил ўтди. Ушбу мақсадлар миллионлаб одамларнинг, мактабга боришни истаган қизларнинг, тенгликни қўллаб-қувватлайдиган аёлларнинг, тоза ҳаво ва хавфсиз сайёра учун курашадиган ёшларнинг келажагини белгилайди. Сиз эса ўз ваъдаларингизни бажармадингиз. Мен шуни билмоқчиман, сизлар қачон ишлашни бошлайсиз?», – деди БМТнинг Тинчлик элчиси ва Нобель мукофоти совриндори Малала.
Мавзуга доир: Нобелнинг энг ёш соҳиблари ҳақида
БМТ Бош ассамблеясида мамлакатлар 2030 йилгача мўлжалланганБарқарор ривожланиш мақсадларини 2015 йилда қабул қилган. Белгиланган муддатнинг учдан бир қисми аллақачон ўтган. 2020 йил, БМТ таъкидлаганидек, халқаро ҳамжамият олдида турган вазифаларни бажариш учун ўн йиллик ҳал қилувчи ҳаракатни очади.
Малала Юсуфзайнинг таъкидлашича, коронавирус пандемияси кўплаб ривожланиш мақсадларига эришиш учун катта тўсиқ бўлиб қолди.
«Агар биз фақат таълим ҳақида гапирадиган бўлсак, бу инқироз тугаганидан кейин 20 миллион қиз ўз парталарига қайтмаслиги мумкин. Жаҳон таълими учун ажратиладиган маблағ етишмовчилиги йилига аллақачон 200 миллиард долларни ташкил этади», – дейди ҳуқуқ ҳимоячиси.
«Пандемия тўсиқ, лекин баҳона эмас», – деди Малала Юсуфзай ва дунё раҳбарларини ваъдаларини бажаришга ҳамда «янги давр» – адолат даврини бошлашга чақирди.
Тадбирда сўзга чиққан БМТ Бош котиби Антонио Гутерреш «миллионлаб муҳтожлар глобаллашув ва иқтисодий ўсишдан ҳеч қандай фойда кўрмаганлар»ини таъкидлади.
«Пандемия таназзулга олиб келди. Аҳолининг энг заиф қатлами учун пандемия оқибатлари жуда оғир бўлди.Келгуси бир неча ой ва йиллар давомида қабул қиладиган қарорларимиз 2030 йилга келиб бизнинг дунёмиз қандай бўлишига катта таъсир қилади», – дейди бош котиб.
Унинг таъкидлашича, Барқарор ривожланиш мақсадлари пандемия ва натижада юзага келадиган ижтимоий-иқтисодий инқироздан қутулиш бўйича тайёр ҳаракатлар режаси. Шу билан бирга, у сиёсий ироданинг етишмаслигидан афсусланди, шунинг учун дунё раҳбарлари қатъий чоралар кўрмайди.
«Келинглар, келгуси ўн йилликни ҳаракатлар, қатъиятлилик, ўзгаришлар, умид ва тинчлик ўн йиллиги қилайлик», – дея хулоса қилди БМТ раҳбари.
Изоҳ (0)