Россияда бир ҳафтада 40 мингдан ортиқ кишида COVID-19 аниқланди. Бу июль ойидан буён энг юқори кўрсаткич

Россияда сўнгги суткада 6148 киши COVID-19’га чалинди. Бу 18 июлдан буён кузатилган энг юқори кўрсаткич, деб ёзмоқда «РБК».

Сўнгги ҳафтада қайд этилган касалланишлар сони июль ойидан буён илк бор 40 минг кишидан ошган. Коронавирусга қарши тезкор штаб маълумотларига кўра, 14 сентябрдан 20 сентябргача 40 588 киши касалланган, ундан бир ҳафта аввал эса бу кўрсаткич 37 306 нафарни ташкил қилган. Охирги марта 20—26 июль давомида 40 мингдан ортиқ (40 939) киши COVID-19’га чалингани қайд этилган.

Мамлакатда пандемия давридан буён 1 103 399 кишида коронавирус қайд этилган. Уларнинг 900 мингдан ортиғи соғайган, 19 418 нафари вафот этган.

«Роспотребнадзор» маълумотларига кўра, Россияда коронавирусни аниқлаш бўйича сўнгги суткада 364 мингта, умумий ҳисобда эса 42,8 миллиондан ортиқ тест ўтказилган.

Аввалроқ россиялик вирусологлар COVID-19’дан тузалганларнинг атрофдагиларга қанчалик хавф туғдиришини баҳолагани ҳақида хабар берилган эди.