Буюк Британия бош вазири Борис Жонсон мамлакатда коронавирус билан касалланишнинг иккинчи тўлқини бошланганини тан олди ва вирус тарқалишининг олдини олиш учун қаттиқ карантин чоралари қабул қилинишини истисно этмади, деб хабар беради «РИА Новости».
«Айни кунда иккинчи тўлқинни кўриб турибмиз. Бундан қочиб бўлмасди», — дейди Жонсон.
Британияда 14 сентябрдан «олти қоида» номли карантин талаблари кучга кирган: таълим муассасалари ёки ишга боғлиқ учрашувлардан ташқари барча тадбирларда олти кишидан ортиқ одамнинг тўпланиши тақиқланади.
«Мен иккинчи миллий локдаунни хоҳламайман, бу барча истайдиган энг сўнгги чора. Янги чеклов чораларини киритишни хоҳламайман, мактаблар очиқ қолиши тарафдориман. Иқтисодиётимиз ҳам имкон борича очиқ қолишини, бизнес ишлашини истаймиз. Буни таъминлашнинг ягона йўли — ўрнатилган қоидаларга риоя қилиш», — дея таъкидлайди бош вазир.
Буюк Британияда ўтган бир сутка ичида коронавирус билан касалланганлар сони 4 минг кишига ортган. Жонс Ҳопкинс университети маълумотларига кўра, мамлакатда коронавирусга чалинганлар сони 388 минг кишидан ошган, ҳозирга қадар 41 мингдан ортиқ бемор COVID-19 қурбонига айланган.
Аввалроқ Арманистонда коронавирус сабабли 2021 йилнинг 11 январигача карантин эълон қилингани, Киевда коронавирус билан касалланиш бўйича суткалик рекорд янгилангани сабаб шаҳарда карантин чекловлари қайтарилаётгани тўғрисида хабар берилганди.
Изоҳ (0)