Алексей Навальний Instagram саҳифасида «Новичок» моддаси билан заҳарланганидан сўнг тикланиш жараёни қандай кетаётганини айтиб берди, дея хабар бермоқда Meduza нашри.
Сиёсатчининг сўзларига кўра, ҳозир у мустақил равишда сув қуёлмаяпти ёки телефонини қўлига ололмаяпти, аммо яқин вақтгача у гапира олмаган ва ҳеч кимни танимаган.
«Ҳар куни эрталаб менга бир шифокор келиб, Алексей, мен доскани олиб келдим, келинг, унга қандай сўз ёзиш кераклигини ўйлаймиз, дерди. Бу мени умидсизликка туширарди, чунки шифокор нимани хоҳлашини тушунган бўлсам-да, сўзларни қаердан олишни билмасдим», – дейди Навальний.
Мухолифатчи зинапоядан кўтарилаётганда оёқлари қалтираганини, аммо энди унинг олдида зинапоя борлигини тушунаётганини ёзган. Аввал эса у «шунчаки у ерда туриб, бепарволарча қараб турган»ини айтган.
Навальнийнинг қўшимча қилишича, у даволанаётган Берлин шаҳридаги «Шарите» клиникаси шифокорлари уни «техник жиҳатдан тирик одамдан» яна Instagram’ни сайр қиладиган ва қаерга лайк қўйишни дарҳол тушунадиган замонавий жамиятнинг аъзоси бўлиш имкониятига эга бўлган инсонга айлантирди.
https://www.instagram.com/p/CFUAPu8llSO/?utm_source=ig_embed
Эслатиб ўтамиз, 2 сентябрь куни Германия ҳукумати Навальний Россияда «Новичок»га ўхшаш модда билан заҳарланганини маълум қилган. Германия канцлери Ангела Меркель Россия ҳукумати Навальний заҳарланиши билан боғлиқ жиддий саволларга жавоб бериши кераклигини айтди. Мухолиф сиёсатчига қилинган суиқасд Буюк Британия, АҚШ ва Францияни ҳам ғазаблантирди. Лондон Навальнийга нисбатан кимёвий қурол қўлланилишини «аблаҳона иш» деб атади. Вашингтон айбдорларга нисбатан молиявий чекловлар қўллашга ваъда берди.
Навальний 15 сентябрь куни Навальний заҳарланганидан сўнг илк бор Instagram’да пост қолдирди. Унга илова қилинган суратда Навальний касалхона койкасида ўтиргани, ёнида рафиқаси Юлия, қизи Даря ва ўғли Захар акс этган.
14 сентябрь куни Навальний даволанаётган Берлиндаги «Шарите» клиникаси россиялик сиёсатчининг аҳволи яхшилангани, у сунъий нафас олдириш аппаратидан тўлиқ узилганини маълум қилганди. Шифокорлар унинг ҳаракатчанлиги ошаётгани ва қисқа вақтга ётган ўрнидан туриши мумкинлигини билдирган. Бундан ташқари, Навальний тиббиёт ходимларига ўз ҳолати ҳақидаги маълумотларни оммага етказишга шахсан ўзи рухсат берган илк ҳолат бўлди (унгача бундай маълумотлар рафиқаси Юлия рухсати билан эълон қилинаётганди).
The New York Times газетаси маълумотига кўра, Навальний Германия прокуратураси вакиллари билан мулоқот қилган. Нашр ГФР хавфсизлик хизматларидаги манбасига асосланиб, ушбу суҳбат мазмунини келтирган. «У ўз ҳолатини, у билан нима рўй бергани ва ҳозир қаердалигини тўлиқ англамоқда. У Германияда қолмоқчи эмас, ўз миссиясини давом эттириш учун Россияга қайтмоқчи», деган The New York Times суҳбатдоши.
Германиянинг Der Spiegel нашри ўз манбаларига асосланиб ёзишича, Германия хавфсизлик хизмати ходимлари фикрига кўра, Навальнийнинг заҳарланиши ортида Россия махсус хизматлари турган бўлиши мумкин. Кремлдагилар Россияга қарши айбловларни асоссиз деб атаган.
Изоҳ (0)