Шота Арвеладзе: «Шабоб ал-Аҳли»га қарши илк ўйинимиздан кейин рақибда кўп ўзгаришлар бўлди

Осиё Чемпионлар Лигаси 5-тури доирасида ўтадиган «Пахтакор» ва «Шабоб ал-Аҳли» жамоалари ўртасидаги учрашув олдидан матбуот анжумани ўтказилди.

Унда «Шерлар» устози Шота Арвеладзе ўз фикрлари билан ўртоқлашди.

Ўйлашимча, дастлабки икки ўйин ҳам ҳал қилувчи мақомида эди. Агар очколарга қарасак, бундай баҳслар олдинда бизни кутиб турибди. Ушбу рақиб билан узоқ вақт олдин, февралда тўқнаш келгандик. Ўшанда кучли ёмғир ёғганди, майдонда сув бор эди. Шунга қарамай, жуда яхши ўйинга гувоҳ бўлгандик. Шундан бери «Шабоб ал-Аҳли»да катта ўзгаришлар рўй берди. Бош мураббий алмашди, бир неча янги ўйинчилар бор. Бу энди янги тўқнашув. Барчасига боқсак, бизни жуда қизиқарли, муҳим ўйин кутмоқда. Биз келажакка умид билан боқамиз.

Рақиб сафида ўзгаришлар борлигини таъкидлаб ўтдим. Карлос Эдуардо жуда яхши савиядаги футболчи. У чап қанотда ва ҳужум ортида яхши ўйнай олади. Охирги баҳсда айнан унинг тўп узатишидан кейин гол урилди.

Ҳар бир жамоа жисмонан, тактик ва индивидуал ижрочилар тарафдан энг яхши оралиқни топа олса, шунда энг кучли клублар қаторига кира олади. Бунга эриша олган эса энг яхши мураббийга айланади. Биз бу ўйинда ўзимизни кўрсатишга уринамиз. Осон бўлмаган тақвим пайтида футболчиларни жисмонан тетик сақлаш жуда муҳим. Футболда ҳар бир ўйин янги тўқнашув, янги адреналин, янги кундир.

Шота Арвеладзе, «Пахтакор» бош мураббийи

Қийин ва қизиқарли учрашув бўлади деб ўйлайман. Биз Чемпионлар Лигасида айнан шундай даражадаги ўйинларда майдонга тушиш учун ҳам шу ердамиз. Ўзбекистон ва БААнинг етакчи клублари ўртасида тўқнашув бўлади. Биз кейинги босқичга чиқиш учун бор кучимизни ишга соламиз. Мазкур баҳсда буни уддалаш имконияти бор.

«Шабоб ал-Аҳли» билан биринчи ўйинда ҳаво футболга мос бўлмаганди, албатта. Лекин биз учун ҳам майдоннинг сифатли бўлиши жуда муҳим. Биз кўп тўп узатишлар билан, чиройли ва ҳужумкор футбол ўйнай оламиз. Чиройли голлар уришга қодирмиз.

Рақиб узун паслар билан тез ҳужумларга ўтишини биламиз. Бизда бу ўйинга режа бор, аммо уни сизга айта олмайман. «Шабоб ал-Аҳли»нинг бир неча ўйинларини ўргандик. Майдонда барчасини кўрасиз деган умиддаман.

Егор Кримец, «Пахтакор» ҳимоячиси