Ўзбекистон Республика товар хом ашё биржасининг биржа савдоларига илк бор Туркманистондан импорт қилинган ECO-93 бензини қўйила бошланди, дея хабар беради биржанинг махсус ахборот портали.
Автобензиннинг сотувчиси сифатида «Нара-Комфорт Сервис» МЧЖ иштирок этмоқда. Товарни етказиб бериш шартлари – EXW сотувчи омборидан олиб кетиш. Янги биржа товарининг бошланғич нархи маҳсулотнинг 100 килограмми учун 600 минг сўмни ташкил этади.
Эслатиб ўтамиз, турли хил манбалардан олинган маълумотларга кўра, бир тонна бензин ўртача 1293-1370 литрни ташкил этади.
Биржа савдоларида иштирок этиш учун «ЎзРТХБ» АЖда онлайн аккредитациядан ўтиш ва биржанинг брокери билан шартнома тузиш лозим.
Маълумот учун: ЕСО-93 автобензини Туркманистонда 2019 йилдан буён ишлаб чиқарилади. ЕСО-93 автобензинидан фойдаланилганда зарарли чиқиндилар миқдори – олтингугурт оксиди 50 баробар, азот оксиди – 5 баробар, углерод оксиди – 2 баробар, углеводород 20 фоизгача камаяди.
Аввалроқ «Ўзбекнефтгаз» Аи-92 маркали бензин нархини 15 сентябрдан бошлаб арзонлаштириши маълум қилинганди.
Изоҳ (0)