Ретроуслуб ва «механика»: Янги Nissan Z Proto спорткари тақдим этилди (фото)

Nissan компанияси амалдаги 370Z сериясининг ўрнини эгаллайдиган янги Z-серия моделларининг илк прототипи — Z Proto’ни тақдим этди. Ретро услубдаги прототип V6 битурбомотори ёрдамида ҳаракатга келади, деб хабар беради Motor.

Nissan Z Proto’нинг ташқи кўриниши устида Infinity’нинг собиқ стилисти кубалик Альфонсо Альбайса бошчилигидаги япониялик дизайнерлар жамоаси ишлаган. Унинг экстереридаги айрим элементлар Z-сериянинг аввалги моделларидан олинган: масалан, олд оптика — 240З фараларининг замонавий интерпретацияси, прототипнинг орқа қисми — ХХ асрнинг охирларига тегишли 300ZХ’ники.

Модель ўлчамлари маълум: Z Proto узунлиги 4382 миллиметрни, эни 1850 миллиметрни, баландлиги эса — 1310 миллиметрни ташкил этади. Шундай қилиб, прототип ўлчамлари жиҳатдан 370Z моделини ортда қолдиради.

Бўлажак спорткар ҳамон яратилиш жараёнида. Серияли моделга тахминан 405 от кучига эга V6 битурбомотор ўрнатилиши маълум, холос. У олти поғонали механик узатмалар қутиси ёрдамида бошқарилади.

Агарда двигатель тўғрисидаги маълумотлар тасдиқланса, янги модель 337 от кучига эга 3,7 литрли V6 моторига эга 370Z’ни ортда қолдиради.

Прототип уч кегайли руль, анъанавий олти поғонали узатмалар қутиси ричаги, 12,3 дюймли рақамли қурилмалар панели ва кичикроқ мултимедиа тизими экранига эга бўлади. Олд панелда учта қўшимча шкалани пайқаш мумкин, вентиляция дефлекторлари эса эшикка кўчирилган.

Серияли спорткупе 2021 йил давомида тақдим этилиши кутилмоқда.