Турон спорт тури асосчиси Баҳодир Саидов 15 сентябрь, сешанба куни 66 ёшида вафот этди. Бу ҳақида Жисмоний тарбия ва спорт вазирлиги матбуот хизмати хабар бермоқда.
Қайд этилишича, Баҳодир Саидов узоқ йиллар давомида Ўзбекистон Республикаси Жисмоний тарбия ва спорт қўмитаси ҳамда Ўзбекистон футбол федерациясида масъул лавозимларда меҳнат қилган. Унинг ўлими сабаби ҳақида маълумот берилмаган.
«Яккакураш спорт турлари билан ёшлигидан шуғулланган Баҳодир Саидов 1981 йилда ҳозирги Ўзбекистон Давлат Жисмоний тарбия ва спорт университетини тамомлаган. У 40 йилдан ортиқ вақт давомида жисмоний тарбия ва спорт соҳасида фаолият кўрсатиб, мамлакатимиз спорти ривожига улкан ҳисса қўшган инсон эди», — дейилади вазирлик хабарида.
Турон яккакураши — миллий спорт тури ҳисобланиб, туркий халқлар жанг қилиш санъати намунаси сифатида қадимдан машҳур бўлган. 1991 йилда Баҳодир Саидов Турон яккакурашининг замонавий қонун-қоидаларини ишлаб чиққан. Бу спорт турида курашчилар пешонабанд белбоғ боғлаб, яктак, кенг иштон кийиб мусобақалашади. Турон яккакурашининг икки: жанг ва эркин машқ йўналиши бор. Жанг йўналиши бўйича беллашув икки қисмдан иборат бўлиб, ҳар бир қисми дақиқадан бўлади, катта ёшдаги спортчилар учун бир раунд беш дақиқани ташкил қилади. Қолган ёшдагилар учун бир раунд 2-3 дақиқа ҳисобланади. Ўзбекистонда Турон яккакураши федерациясида 1995 йилда ташкил этилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)