«Насаф» бош мураббийи Рўзиқул Бердиев Coca-Cola Суперлига 15-тури доирасида «Андижон»га қарши кечган ўйиндаги ғалабадан (1:0) кейин ўз фикрлари билан ўртоқлашди.

Бу баҳсда рақибдан яхшироқ ўйнамадик. Лекин, ғалаба қозондик. Бу футболда муҳим аҳамият касб этади. Агар мағлуб бўлганимизда ўз хатоларимиз эвазига ютқазган бўлардик. Футболчиларни бу ўйинга руҳий томондан тайёрлаш қийин бўлди. Истасак истамасак йигитлар мусобақа жадвалига, рақибнинг охирги ўйинларига қарайди. Тан олиш керак, «Андижон» жамоаси бизга етарлича қаршилик кўрсатди. Уларнинг ҳимоя ва ҳужум чизиғида муаммолар борлигини билардик. Хатолардан унумли фойдаланиш кераклигини тушунтирдик.

Юқорида ҳам айтдим, «Андижон»дан яхши ўйнамадик. Кийиниш хонасида ҳам йигитларга бу охирги ёмон ўйинимиз бўлиши кераклигини айтдим. Жамоамиз бу қадар ёмон тўп тепмаган. Энг ёмон ўйинларимиздан бирини ўтказдик. Майдон ҳолати ҳам идеал эмас эди. Шунинг учун ҳам икки жамоа қийналди. Мазмунли ўйин кўрсатиш учун тўсқинлик қилди.

«Андижон»нинг йўқотадиган ҳеч нарсаси йўқ эди. Улар ҳар бир баҳсда натижа учун ўйнамоқда. Шунинг учун маҳорати етганича курашмоқда. Рақиб тўртта ҳужумчи билан олдинга ўтгани учун учинчи марказий ҳимоячини туширдик. Бу схемада кўп ўйнаганмиз. Асосий мақсадимиз натижани сақлаб қолиш эди.

Рўзиқул Бердиев, «Насаф» бош мураббийи

«Насаф» мазкур ғалабадан кейин очколарини 29 тага етказиб олган ҳолда 2-ўринга кўтарилди. Жамоа кейинги турда «Сурхон»га қарши баҳс олиб боради.