Американинг Пенсильвания штатида Classic Cars аукциони орқали 1950 йилда ишлаб чиқарилган Lincoln Cosmopolitan сотувга қўйилди. АҚШнинг 33-президенти Гарри Трумэннинг буюртмаси асосида яратилган лимузин 160 минг долларга баҳоланмоқда, деб хабар беради Motor.
1945 йилда АҚШ президенти этиб сайланган Гарри Трумэн бир неча йилдан кейин General Motors’дан Оқ уй автопарки учун ўнта автомобиль ясаб беришни сўраган. Бироқ 33-давлат раҳбарининг радикал сиёсати сабаб Америка автомобилсозлик компанияси машина йиғишдан бош тортади. Шу муносабат билан Оқ уй раҳбарияти 10 та Lincoln Cosmopolitan лимузинларини ижарага олади, уларнинг ҳар бири Америка президентининг хавфсизлик талабларига жавоб берган.
Аукционга қўйилган Lincoln’дан шахсан Гарри Трумэннинг ўзи Нью-Йоркка ташрифи вақтида фойдаланган. Лимузин катталаштирилган 368 сантиметрли ғилдираклар базасига эга. Шу сабабли унинг салонига 7 киши бемалол сиға олади. Шунингдек, автомобилнинг ўзига хос хавфсизлик талабларига кўра, у қўшимча зирҳ билан қопланган. Бу эса машина оғирлигини 2,7 тоннага етишига олиб келган.
Сотувчининг сўзларига кўра, лимузин ажойиб ҳолатда сақланган. 1990 йилда лимузин тўлиқ реставрациядан ўтган ва 2001 йилга қадар Флорида музейи кўргазмаларида иштирок этган. Lincoln Cosmopolitan капоти остидан 152 от кучига эга 5,5 литрли V8 мотори ўрин олган. Агрегат уч поғонали автоматик узатмалар қутиси ёрдамида бошқарилади. Ретро автомобилнинг максимал тезлиги соатига 150 километрга етади.
Аввалроқ АҚШда Иордания қиролининг зирҳли лимузини катта чегирма билан сотувга қўйилгани тўғрисида хабар берилганди.
Изоҳ (0)