Hyundai «совундон-машина»ни йиғиш жараёнини намойиш этди. Уни исталган одам бажара олади

Hyundai компанияси «совундон» дея таржима қилинувчи Soapbox лойиҳасига оид янги маълумотлар билан бўлишди. У мустақил равишда йиғилган моторсиз машина кўринишига эга. Марка вакилларининг сўзларига кўра, уни исталган одам йиға олади, деб ёзади Motor.

ХХ асрнинг биринчи ярмида Европа ва АҚШда Soapbox Derby номли оммавий эрмак ўйин пайдо бўлган бўлиб, у «совундонлар пойгаси» дея таржима қилинади. Унда ҳеч қандай двигатель ёки тепкилар ўрнатилмаган, қўлбола коробкалар ёрдамида тепаликдан ким биринчи тушиш бўйича беллашув ўтказилган. Hyundai «совундони» ҳам айнан шу каби кўнгилхушликка мўлжалланган.

Уни йиғишга Hyundai Motor Europe Техник маркази мутахассислари жавобгар бўлган. Детальларнинг аксарият қисми ёғочдан ишланган. Улар металл кронштейн ва винтлар ёрдамида ўзаро қотирилади. Руль ўрнини худди велосипеддаги каби бир жуфт тутқич эгаллаган; ғилдираклар боғ аравасиники. Шунингдек, оддий тормоз механизми ҳам мавжуд.

«Совундон» узунлиги йиғилган ҳолда 1,76 метрга етади, эни эса бир метр. Кузов Hyundai’нинг сариқ рангига бўялган.

Аввалроқ Hyundai Palisade эгалари оммавий равишда салондаги эски пайпоқ ҳидидан шикоят қилаётгани тўғрисида хабар берилганди.