Ўзбекистоннинг машҳур хонандаси вояга етмаган қизнинг номусига теггани юзасидан қўшимча текширув тайинланди

Ўзбекистоннинг машҳур хонандаси вояга етмаган қизнинг номусига теггани, ИИБ эса хонандага нисбатан жиноий иш очишни рад этгани, Бош прокуратура қарор қонунийлиги текширилишини маълум қилганди. Бош прокуратуранинг «Дарё»га маълум қилишича, Каттақўрғон тумани ИИБ ҳузуридаги ТБнинг жиноят иши қўзғатишни рад қилиш ҳақидаги қарори назорат тартибида ўрганиб чиқилди.

Аниқланишича, 17 июнь куни Ургут туманида яшовчи фуқаро Ф.Р. Каттақўрғон тумани ИИБ бошлиғига ариза билан мурожаат қилган. Унда 13 июнь куни вояга етмаган қизи Ш.М.ни дугонаси Д.С. Каттақўрғон туманига олиб келиб, уни қўшиқчи Ж.У. ва унинг бир ўртоғи билан таништиргани, улар қизларни бир уйга олиб борганлиги ва шу куни Ж.У. қизи Ш.М.ни зўрлаб номусига текканлигини, шу сабабли Ж.У.га нисбатан қонуний чора кўришни сўраган.

Судга оид тиббиёт экспертизанинг 26 июндаги хулосасида фуқаро Ш.М.нинг танасида, яъни кўз юқори қовоқлар, иккала болдир, ўнг билак соҳаларида қонталашлар каби жароҳатлар аниқланиб, ушбу жароҳатлар суд-тиббий текширувига қадарли бир кундан кўп, икки кундан кам бўлган вақт оралиғида етказилган бўлиши мумкинлиги кўрсатилган.

Мазкур мурожаат юзасидан Каттақўрғон туман ИИБ ҳузуридаги ТБ терговчиси томонидан терговга қадар текшириш ҳаракатлари ўтказилиб натижасига кўра, 10 июль куни Жиноят процессуал кодексининг 83-моддаси 2-бандига асосан жиноят иши қўзғатишни рад этиш ҳақида қарор қабул қилинган.

Тўпланган ҳужжатлар Самарқанд вилояти прокуратураси томонидан назорат тартибида ўрганиб чиқилганда, бир қатор терговга қадар текширув ҳаракатлари тўлиқ бажарилмаганлиги, терговчи Жиноят процессуал кодексининг 22-моддасида кўрсатилган жиноят юз берганлигини, унинг содир этилишида ким айбдорлигини, шунингдек, у билан боғлиқ барча ҳолатларни аниқлаш шартлигини, иш бўйича исботланиши лозим бўлган барча ҳолатлар синчковлик билан ҳар томонлама, тўла ва холисона текшириб кўрилмасдан шошма-шошарлик билан қабул қилинганлиги аниқланган.

Юқоридагиларга кўра, Каттақўрғон туман ИИБ ҳузуридаги ТБнинг 10 июль кунги жиноят иши қўзғатишни рад этиш тўғрисида қабул қилган қарор Самарқанд вилояти прокуратураси томонидан 10 сентябрь куни бекор қилиниб, қўшимча текширув ҳаракатлари олиб борилишлик учун Каттақўрғон туман ИИБ ТБга юборилган.