Сенатнинг еттинчи ялпи мажлисида «Наркологик касалликлар профилактикаси ва уларни даволаш тўғрисида»ги қонун сенаторлар томонидан муҳокама қилиниб, маъқулланди. Бу ҳақда Сенат матбуот хизмати хабар берди.
Сенат раиси Танзила Норбоева ушбу қонун ҳақида ўз мулоҳазаларини билдириб, эътибор қаратилиши зарур бўлган асосий масала — профилактика эканлигини таъкидлади.
«Биринчи навбатда гиёҳванд моддалар ва психоактив воситаларнинг мамлакатга кириб келиши ва истеъмолига қарши курашишнинг самарали механизмларидан фойдаланиш лозим. Бундай моддалар истеъмолининг асосий аудиторияси ёшлар бўлиб, улар орасида сўнгги пайтларда анъанавий гиёҳванд моддаларидан ташқари турли сунъий (синтетик) моддалар истеъмоли оммалашаётгани ҳаммамизни ташвишлантириши керак», — деган у.
Танзила Норбоева ҳозир ёшларни гиёҳвандга айлантириш учун уларни кўчаларда қидириб юришдан кўра интернетдаги ижтимоий тармоқлар орқали йўлдан уриш осон бўлиб қолганини қайд этди. «Интернетга кириб, синтетик психоактив моддалар тайёрлаш ва уларни истеъмол қилиш бўйича минг ҳил ‘маслаҳат’ топиш мумкин», — дейди Сенат раиси.
Шунингдек, гиёҳвандликка қарши курашиш фақатгина ҳуқуқни муҳофаза қилувчи органларнинг иши, дея қараш нотўғрилиги, бунга ҳамма – бутун жамият масъул эканлигини таъкидлади.
Ички ишлар вазирининг жамоат тартибини сақлаш бўйича ўринбосари Азизбек Икромовнинг маълум қилишича, ҳозирги кунда Ўзбекистонда 5889 нафар ёшлар гиёҳвандлик моддалари истеъмол қилувчи сифатида рўйхатда туришибди. Уларнинг асосий қисми Андижон, Фарғона вилоятлари ва Тошкент шаҳрига тўғри келади.
Аввалроқ ушбу ялпи мажлисда «Ногиронлиги бўлган шахсларнинг ҳуқуқлари тўғрисида»ги қонун сенаторлар томонидан муҳокама қилиниб, маъқуллангани хабар берилган эди.
Изоҳ (0)