Адлия вазири Русланбек Давлетов иштирокида ОАВ вакиллари учун 2020 йилнинг 11 сентябрь куни матбуот анжумани ташкил этилди. Унда вазирликда коррупцияга қарши кураш тизимининг яратилиши, унинг ўзига хос хусусиятлари ва эришилган натижалар тўғрисида сўз борди. Бу ҳақда «Дарё» мухбири Миролим Исажонов хабар бермоқда.
Давлетовнинг таъкидлашича, коррупцияга қарши ўлим жазосини жорий қилишдан кўра, жазонинг муқаррарлиги муҳимроқдир.
«Кўп одам ‘Ўлим жазосини киритиш керак, қаттиқ жазолаш лозим, Хитой шундай қиляпти’, дейди. Мен бундай фикрларга, умуман, қўшилмайман. Гап ўлим жазосида эмас, жазонинг муқаррарлигида, деб ўйлайман. Transparency International ташкилотининг бутун дунё тан олган рейтинги бор. Бу коррупцияни қабул қилиш индекси. Унга киритилган давлатларни ўрганиб чиқсангиз, бирортасида коррупцияга қарши ўлим жазоси йўқ.
Ўлим жазоси нима учун керак? Давлатнинг кимнидир ўлдиришини бугунги XXI асрда мен қабул қилолмайман. У одамга ҳаётни давлат бахш этмаган.
Ҳамма яхши кўрадиган ва жуда кўп гапирадиган Сингапурда энг максимал жазо 7 йил, асосий ҳолатларда эса 5 йил. Бу қонун ҳужжатларида белгиланган. Сингапурнинг коррупцияга қарши курашдаги бугунги даражаси кўпчиликка маълум.
Шу ўринда яна айтмоқчиманки, коррупцияга қарши ўлим жазосини жорий қилиш ёки 20 йилга қамаш, деган нарса аҳамиятга эга эмас. Жазонинг муқаррарлиги, яъни ҳар битта ҳолатда: майда коррупция кўринишидан тортиб энг каттасигача давлат, жамият томонидан кучли реакция бўлиши керак, деган фикрдаман», — деди Адлия вазири.
Эслатиб ўтамиз, Шавкат Мирзиёев 2020 йил 24 январда Олий Мажлисга йўллаган мурожаатномада коррупциянинг оқибатлари билан курашишдан кўра барвақт олдини олишга ўтиш кераклигини таъкидлаб, унга қарши курашишга масъул бўладиган алоҳида орган тузишни таклиф қилган эди. 2020 йилнинг 11 февралида мазкур органни ташкил этиш масалалари бўйича Президент раислигида йиғилиш бўлиб ўтганди. Июнь охирига келиб мамлакатда Коррупцияга қарши курашиш агентлиги ташкил этилди ва унга «Юксалиш» умуммиллий ҳаракати раиси, Олий Мажлис Қонунчилик палатаси депутати Акмал Бурҳонов директор этиб тайинланди.
Изоҳ (0)