Ғарб мамлакатлари дипломатлари Беларусь мухолифати томонидан тузилган мувофиқлаштирувчи кенгаш президиуми аъзоси, ёзувчи Светлана Алексиевичнинг уйида икки кундан буён навбатчилик қилмоқда. Уларнинг сўзларига кўра, бу иш ёзувчини эҳтимолий таъқибдан ҳимоя қилиш мақсадида амалга оширилмоқда. Бу ҳақда Meduza хабар берди.
Светлана Алексиевич 9 сентябрь куни эшиги қўнғироғи жиринглаётгани ва унга номаълум рақамлардан қўнғироқлар бўлаётганидан шикоят қилган. «Мувофиқлаштирувчи кенгаш президиумидаги ҳамфикр дўстларимдан ҳеч ким қолмади. Уларнинг бари ёки қамоқда, ёки хорижга чиқариб юборилган. Аввал бизнинг мамлакатимизни ўғирлашди, энг яхшиларимизни ўғирлашмоқда. Бироқ қаторимиздан олиб ташланганлар ўрнига юзлаб бошқалари келади. Мувофиқлаштирилмайдиган қўмита оёққа турди. Мамлакат оёққа турди», — дея маълум қилган Алексиевич.
Мурожаат эълон қилинганидан кейин ёзувчининг уйига бирданига бир нечта Европа мамлакатларининг дипломатлари етиб келган. Улар қаторидан Литва, Польша, Германия, Словакия, Чехия, Швеция ўрин олган.
«Бизга унинг хонадонига номаълум одамлар, эҳтимол хавфсизлик ёки полиция вакиллари қўнғироқ қилаётгани тўғрисида сигналлар келди. Алексиевич мувофиқлаштирувчи кенгашнинг ҳибсга олинмаган ёки Беларусдан чиқиб кетмаган сўнгги аъзоси бўлгани учун у ҳибсга олиниши мумкин, деган қарорга келдик», — деди Литванинг Беларусдаги элчиси Андриус Пулокас. Дипломатлардан бирининг сўзларига кўра, улар ёзувчининг квартирасида навбатчиликда қолишмоқчи, шу жумладан, тунда ҳам навбатчилик қилишади.
10 сентябрь куни Алексиевични қўллаб-қувватлаш учун келган дипломатлар сони ортди. Швеция ташқи ишлар вазири Анн Линденинг маълум қилишича, бу сафар ёзувчининг уйига 15 мамлакат дипломатлари ва Европа Иттифоқи вакили йиғилди. «Биз унинг хавфсизлиги ва фаровонлигини ҳимоя қилишни давом эттирмоқдамиз», — деб ёзди Линде.
Изоҳ (0)