Бир ойдан бери туристлар учун очиқ бўлган Туркияда коронавирус тарқалиши яна авж олди

Туркия ҳукумати 8 сентябрь куни мамлакатда коронавирус тарқалишига қарши профилактика чоралари кучайтирилганини эълон қилди. Бутун мамлакат бўйлаб жамоат жойларида ниқобда юриш мажбурий қилиб қўйилди. Кафе, ресторан ва меҳмонхоналардаги тунги концертлар тақиқланди, жамоат транспортларида турган ҳолда кетишга фақат ижтимоий масофаланишга риоя қилинган ҳолда рухсат берилди. Қоидабузарлар маъмурий жавобгарликка тортилади.

Янги чеклов чоралари эълон қилинган кунда Туркияда яна 1761 кишида коронавирус аниқланган — бу май ойи бошларидан бери мамлакатда қайд этилган энг юқори кўрсаткич. Бундан ташқари, Туркия соғлиқни сақлаш вазири Фахриддин Кўжанинг маълум қилишича, мамлакатда коронавируснинг оғир шакли билан касалланган беморлар сони ортмоқда. «Мазкур вазиятни биргаликда санитария қоидаларига риоя қилган ҳолда тўхтатиш мумкин», — деб ёзади амалдор ўзининг Twitter’даги саҳифасига.

Кўжа ўтган ҳафта Туркияда COVID-19 билан касалланишнинг иккинчи тўлқини энг юқори нуқтасига етганини тан олганди. У август ойларида бошланган. Вазирнинг сўзларига кўра, янги касалланиш ҳолатларининг ортишига профилактика чораларига риоя қилинмаётгани сабаб бўлмоқда. «Биз дам олиш жойлари, кўнгилочар масканлар, бозорлар ва маросимларда хавфсизлик чораларига нақадар ёмон риоя қилинаётганини афсус билан кузатмоқдамиз», — дейди вазир.

Жонс Ҳопкинс университети маълумотларига кўра, Туркияда коронавирус билан касалланганлар сони салкам 285 мингдан кишини ташкил этмоқда. Ҳозирга қадар мамлакатда 6837 бемор COVID-19 қурбонига айланган, 254 мингдан ортиқ инсон соғайган.

Эслатиб ўтамиз, август охирларида Ўзбекистон Туркия билан ҳам сентябрь ойидан бошлаб, босқичма-босқич равишда мунтазам авиақатновларни тиклаш масаласини кўриб чиқаётгани тўғрисида хабар берилганди. Uzbekistan Airways рейсларида Ўзбекистонга парвозларни режалаштираётган йўловчилар парвоздан 72 соат олдин COVID-19’га ПЗР усулида олинган тест ҳақидаги маълумотномани рус ёки инглиз тилида тақдим этишлари керак. Тест мусбат натижа берган бўлса, йўловчилар парвозга чиқарилмайди. Ўзбекистон хорижий давлатлар билан авиақатновларини қайта тиклаш учун эпидемиологик вазиятга боғлиқ равишда «қизил», «сариқ» ва «яшил» рейсларни йўлга қўйиш режалаштирилган.