АҚШ президенти Дональд Трамп тинчлик учун Нобель мукофотини олиши мумкин бўлган номзодлар қаторига кирганидан фахрланишини билдирган. Бу ҳақда Оқ уй матбуот котиби Кейли Макинани маълум қилди.
Макинанининг айтишича, президент мазкур номинациядаги мукофот учун муносиб номзод.
«АҚШ президенти Дональд Трамп Исроил ҳамда БАА ўртасидаги муносабатларнинг меъёрлашувига олиб келган Авраам келишувларини тузгани ва етакчилик қобилиятини намойиш этгани учун 2021 йил учун Нобель мукофотига номзод сифатида кўрсатилди. Икки давлат ўртасидаги муносабатларнинг илиқлашуви яқин Шарқда тинчлик ўрнатилишига олиб келиши мумкин», – деган ўз баёнотида Макинани.
Шунингдек, у Трампнинг БАА ҳамда Исроил ўртасидаги муносабатларни халқаро майдонда қўллаб-қувватлагани учун ҳам Нобель мукофотига номзод сифатида кўрсатилганини қайд этган.
«Тинчлик келишуви Трамп сиёсати ва дипломатиясининг тўғри эканига яна бир исбот, президент Нобель мукофотини топшириш кенгаши унинг номзодини ҳам кўриб чиқаётганидан фахрланишини билдирди», – дейилади Оқ уй баёнотида.
Аввал Норвегиянинг «Тараққиёт партияси» депутати Кристиан Тибринг-Гедде Трампни дунёдаги сиёсий можароларнинг тинчлик йўли билан ҳал этишдаги ҳаракатлари сабаб Нобель мукофотига номзод сифатида кўрсатганди. Мазкур қарорнинг чиқарилишига 15 сентябрда Вашингтонда имзоланадиган Бирлашган Араб амирликлари ҳамда Исроил ўртасидаги муносабатларни меъёрлашитиришга қаратилган келишув асос бўлган. БАА Исроилга нисбатан 48 йил давом этган иқтисодий бойкотни бекор қилди. БАА Исроил билан тинчлик келишувига эришган кам сонли араб мамлакатларидан бири ҳисобланади.
Изоҳ (0)