Тошкентда тез ёрдамга чақирувлар кўпайди

2020 йилнинг 15 августидан бошлаб Ўзбекистонда карантин чоралари юмшатилганидан кейин автотранспорт воситаларининг ҳаракати ва бозорлар фаолиятига босқичма-босқич рухсат берилди. 5 сентябрдан қатор фаолият турларига чекловлар бекор қилинди. Улар орасида умумий овқатланиш объектлари (ресторан, кафе, ошхона, чойхона), томоша ва маданий-кўнгилочар объектлари (фақатгина театр ва кинотеатр) ҳамда парклар ва истироҳат боғларидаги аттракционлар ҳам мавжуд.

Соғлиқни сақлаш вазирлиги мазкур чекловларнинг бекор қилингани COVID-19 коронавирус инфекциясининг чекингани ва одамлар эҳтиёт чораларини унутиб, хоҳлаган жойида ҳаракат қилишлари мумкинлигини англатмаслигини қайд этган.

ССВ ахборотига кўра, охирги бир ҳафта давомида коронавирус инфекциясига чалинганларнинг қайд этилиш кўрсаткичи сезиларли даражада пасайган, бироқ хотиржамликка берилиш, вирусга нисбатан ҳушёрликни унутмаслик зарур.

«Масалага тез тиббий ёрдам хизматига қилинаётган мурожаатлар таҳлили мисолида қарайдиган бўлсак, сентябрнинг дастлабки ҳафтасида чақирувлар сони бирмунча ошганлигига гувоҳ бўламиз. Жумладан, Тошкентда августнинг охирги 7 кунида чақириқларнинг умумий сони 18 316 та бўлган бўлса, сентябрь ойининг биринчи 7 кунлигида 19 707 тани ташкил этди. Бу кўрсаткичлар охирги ҳафтада чақириқларнинг умумий сони 1 391 тага ортганини кўрсатади. 1–7 сентябрь кунлари келиб тушган чақирувлардан 6 145 таси (умумий чақириқларнинг 31,2 фоизи) тана ҳароратининг ошиши, 3 091 таси (15,7 фоиз) ўткир респиратор касалликлари билан боғлиқ бўлган бўлса, 814 таси (4,1 фоиз) эса пневмония белгилари мавжуд беморлар томонидан амалга оширилган» , — дейди Тошкент шаҳар тез тиббий ёрдам станцияси бош шифокори Умидулло Рисқиев.

Соғлиқни сақлаш вазирлиги яна бир бор аҳолини ҳушёрликка ва ҳар бир фуқарони ўзини ҳимоя қилиш қоидаларига қатъий амал қилишга чақирган.

«Агар одамлар қўлларини мунтазам ювиб, жамоат ҳамда иш жойларида тиббий ниқобни тўғри ва доимий тарзда тақиб юрса, ижтимоий масофани сақлашни унутмаса, нафақат коронавирус инфекциясидан, балки бошқа мавсумий ўткир респиратор касалликларидан ҳам ўзларини асрашлари мумкин бўлади. Ўзимиз ва яқинларимизни асрайлик! Саломатлигимиз ўз қўлимизда!», – дейилади ССВ хабарида.