Август ойида ижтимоий тармоқларда Самарқанд шаҳрида эри томонидан аёвсиз калтакланаётгани акс этган аёл видеоси тарқалиб кетган, кейинчалик зўравон эр қўлга олингани хабар берилган эди. Олий Мажлис Сенати ушбу аёл билан боғлиқ ҳолат назоратга олинганини маълум қилди.
Қайд этилишича, бугунги кунда жабрланган аёлга Самарқанд шаҳар ИИБ томонидан ҳимоя ордери берилган ва у махсус марказга фарзандлари билан бирга жойлаштирилган.
«Марказда малакали психологлар жалб қилиниб, психологик ёрдам бериляпти, шунингдек, М. тўлиқ тиббий кўрикдан ҳам ўтказилган. Барча зарур дори воситалари олиб берилиб, соғлиғини тиклаши учун ёрдам кўрсатилмоқда. Ҳозирги кунда жабрланувчи мазкур махсус марказда 2 нафар фарзанди билан яшаб келмоқда», — дейилади Сенат хабарида.
Шунингдек, билдирилишича, аёл ва унинг икки нафар фарзанди Самарқанд шаҳар ИИБ томонидан ҳимояга олиниб, моддий ва маънавий ёрдам кўрсатилмоқда.
Ҳозирда унинг турмуш ўртоғига нисбатан Самарқанд шаҳар ИИБ ҳузуридаги Тергов бўлими томонидан Жиноят кодексининг 105-моддаси билан жиноят иши қўзғатилиб, тергов ҳаракатлари олиб борилмоқда.
«Мазкур ҳолат Сенатнинг Хотин-қизлар ва гендер тенглик масалалари қўмитаси томонидан назоратга олинган. Тегишли идораларга ушбу масала қонуний кўриб чиқилиши юзасидан кўрсатмалар берилган», — дейилади хабарда.
Изоҳ (0)