Шавкат Мирзиёев «Суд ҳокимияти органлари фаолиятини рақамлаштириш чора-тадбирлари тўғрисида»ги қарорни имзолади.
Ҳужжат билан, 2020―2023 йилларда суд ҳокимияти органлари фаолиятини рақамлаштириш дастури тасдиқланди.
Қарорга кўра, фуқароларга суд биносидан туриб судлар томонидан кўрсатиладиган интерактив хизматлардан мустақил равишда фойдаланиш имкониятини яратиш мақсадида суд биноларига махсус терминаллар ўрнатиш режалаштирилган.
Бунда терминал параметрларини тасдиқлаш, танлов савдосини ўтказиш ва шартнома тузиш ҳамда ускуналарни сотиб олиш, ўрнатиш ва ишга тушириш кўзда тутилган. Буни бажариш муддати этиб 2021 йил 1 июль, 2021 йил 31 декабрь ва 2022 йил 1 июль белгиланган. Ускуналарни сотиб олиш учун давлат бюджети ва хорижий ҳамкорлар маблағларидан 6 миллиард сўм ажратиш кўзда тутилган.
Масъул ташкилотлар сифатида Олий суд (Б. Исаков), Ахборот технологиялари ва коммуникацияларини ривожлантириш вазирлиги (О. Пекос) ва Инвестициялар ва ташқи савдо вазирлиги (Л. Қудратов) қайд этилган.
Аввалроқ Ўзбекистонда судларга берилган даъволарни кўриб чиқиш жараёнини онлайн кузатиш мумкин бўлиши ҳақида хабар берилганди.
Изоҳ (0)