Россиянинг Самара вилоятида уйга қайтмоқчи бўлган уч мингдан зиёд ўзбекистонлик муҳожир ҳозирда махсус вақтинчалик лагерда бўлиб турибди, деб хабар беради «Эхо Москви» радиоси.
Ўзбеклар миллий-маданий жамияти котиби Ёдгор Усмоновнинг сўзларига кўра, ўзбекистонлик муҳожирлар Кинель шаҳри яқинида жойлашган махсус лагерга келишда давом этмоқда.
6 сентябрь куни Россиядан 900 нафар муҳожирни олиб чиқиб кетган навбатдаги поезд йўлга чиққан. Поездга чиқиш қатъий равишда Ўзбекистон бош консуллиги томонидан тасдиқланган рўйхатлар бўйича амалга оширилмоқда.
Аммо Ёдгор Усмоновнинг айтишича, сўнгги кунларда лагерда поезд чипталарини жуда баланд нархда — 30 минг рублга (400 доллар атрофида) сотаётган олибсотарлар ҳам пайдо бўлган.
Мигрантлар Кинелга 10 августдан келишни бошлаган. Ватанга кетмоқчи бўлиб, улар темир йўл станциясида поезд кутишган. Расмийлар сув ва электр энергияси бўлган махсус вақтинчалик лагер ташкил қилгунча улар перроннинг ўзида матраслар ва қўлбола чодирларда яшашди. Умуман олганда, сўнгги ҳафталарда Кинель станциясидан 4 мингга яқин муҳожир бўлган тўртта поезд Ўзбекистонга жўнаб кетди.
Эслатиб ўтамиз, 3 сентябрь куни Самарадан 922 нафар ўзбекистонлик поездда Самарқандга олиб келинган эди.
Аввалроқ Россиядаги ўзбекистонликларни олиб келиш учун 28 августдан бошлаб Екатеринбург, Ростов-Дон, Новосибирск ва Самарага ҳар ҳафта поезд жўнатилиши ҳақида хабар берилганди.
Бунга қадар Россиянинг Шимолий Кавказ ва Жанубий федерал округларидан 927 нафар, Самара вилоятидан 918 нафар ўзбекистонлик поезд орқали мамлакатга олиб келинган. 9 августда Россиядан поездда олиб келинган 918 нафар ўзбекистонлик Намангандаги карантин зонасига жойлаштирилган. Шунингдек, шу куни бошқа бир поезд Самарадан Самарқандга ўзбекистонликларни олиб келган.
Изоҳ (0)