Бош прокуратура ҳузуридаги департаментнинг Чиноз туман бўлими томонидан пандемия шароитида аҳоли талаби юқори бўлган дори воситаларининг қиммат нархларда сотилиши ҳамда ноқонуний муомалага киритилишининг олди олинди. Бу ҳақда «Дарё»га Бош прокуратура матбуот хизмати хабар берди.
Хусусан, департамент томонидан ўтказилган тезкор тадбирда фуқаро Ш.А. харидорга 65 қути «Клексан» дори воситасини ҳар бир қутисини 576 минг сўмдан ҳисоблаб, 37,5 миллион сўмга сотган вақтида ашёвий далил билан ушланган.
Шунингдек, Ш.А.нинг кўрсатмасига асосан тезкор тадбир давом эттирилиб, Наманган вилоятида дори воситаларини олиб сотиш билан шуғулланиб келаётган фуқаролар Я.М. ва А.Х. Ш.А.дан 65 қути «Клексан» дори воситалари учун 37,5 миллион сўмни олган вақтида ушланган.
Департамент ҳамда ДХХнинг Қува тумани бўлимлари томонидан кучли таъсир қилувчи дори воситалари рўйхатига кирувчи дориларнинг ноқонуний муомалага киритилишининг олдини олиш мақсадида ўтказилган тезкор тадбирда эса фуқаро Я.Я., С.А. ва М.А. билан ўзаро тил бириктириб, харидор Ж.га 40 қути «Лирика 300 мг» дорисини ҳар бир қутисини 75 доллардан ҳисоблаб, 3000 долларга сотган вақтида ашёвий далил билан ушланган.
Мазкур ҳолатлар юзасидан қонунбузарларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Эслатиб ўтамиз, Ўзбекистонда дорилар танқислиги ва нархи оширилгани юзасидан 3000 дан ортиқ дорихонага огоҳлантириш берилган.
Аввалроқ Тошкент вилоятининг Тошкент туманида 99 миллион сўмлик дорилар устига 30 миллион сўм қўйиб сотган шахслар ушлангани, Оққўрғон туманида талаб юқори бўлган дори нархини сунъий ошириб, 30 қутисини 8,1 миллион сўмга сотган шахслар қўлга олингани, Самарқандда 34 миллион сўмлик дори воситаларининг ноқонуний савдосига чек қўйилгани ҳақида хабар берилган эди.
Изоҳ (0)