Самарқандда абитуриентлар учун қўлбола алоқа воситаларини сотаётган шахс ушланди. Бу ҳақда вилояти ИИБ ахборот хизмати хабар берди.
5 сентябрь куни Самарқанд вилояти ИИБ Тезкор-қидирув ҳамкорлиги ҳамда Хавфсиз туризмни таъминлаш бошқармаси ходимлари ҳамкорликда тезкор тадбир ўтказилган. Тадбир давомида абитуриентлар тест синовлари жараёнида фойдаланиши учун қўлбола усулда махсус ясалиб, ички кийимларга ўрнатиладиган алоқа воситаларини 100-200 АҚШ долларидан сотаётган 29 ёшли У. исмли шахс аниқланди.
Самарқанд вилояти Ички ишлар бошқармаси абитуриентларни тест синовларида фойдаланиш тақиқланган буюмларни ўзлари билан имтиҳонга олиб кирмасликлари бўйича огоҳликка чақирган.
Аввалроқ Ўзбекистонда бўлиб ўтаётган имтиҳонларнинг илк кунида 59 нафар абитуриент, иккинчи куни эса 115 нафар абитуриент тестдан четлаштирилгани, кириш имтиҳонларининг биринчи кунидаёқ телефондан фойдаланиш ҳолатлари кузатилгани ҳақида хабарлар берилганди.
Изоҳ (0)