Наманган вилоятида 7 сентябрь куни 12 та мактабда тажриба тариқасида илк дарслар бошланди. Бу ҳақда «Дарё» мухбири Азизбек Абдувалиев хабар бермоқда.
Мазкур дарсларга жами 4,5 минг нафардан ортиқ ўқувчи келди.
Ҳар бир шаҳар-туманда биттадан танланган мактабда бунинг учун пухта тайёргарлик кўрилди. Ўқувчиларнинг тана ҳароратлари текширилиб, қўлларига антисептик воситалар ёрдамида ишлов берилди. Ҳар икки соатда ниқоб алмаштиришларига эътибор қаратилди.
Вилоят халқ таълими бошқармаси матбуот хизматига кўра, Наманганда 9 сентябрь куни яна 16 та мактаб фаолиятини бошлайди. 11 сентябрь куни уларнинг сони 24 тани ташкил этади. 14 сентябрдан эса вилоятдаги 705 та мактабнинг барчаси очилиши режалаштирилган.
Маълумот учун, вилоятда 2020 йил 25—26 август кунлари ўтказилган сўровномаларда иштирок этган 395 минг нафар ўқувчининг ота-онаси (80 фоиз) фарзандлари учун анъанавий ўқиш усулини танлаган. 96 минг нафардан ортиқ ўқувчининг ота-онаси эса (20 фоиз) онлайн дарсларни маъқул деб топган.
Изоҳ (0)