Пандемия даврида кўрилган дезинфекция чоралари натижасида Ўзбекистонда ўткир ичак юқумли касалликларининг тарқалиши камайган. Бу ҳақда Соғлиқни сақлаш вазирлиги ҳузуридаги Коронавирусга қарши кураш штаби аъзоси, Соғлиқни сақлаш вазирлиги ҳузуридаги Санитария–эпидемиологик осойишталик агентлиги бошқарма бошлиғи, эпидемиолог Рустам Икромов 7 сентябрь куни АОКАда бўлиб ўтган брифингда маълум қилди.
Рустам Икромовнинг таъкидлашича, «дезинфекцион туннелларнинг умумий фойдаси йўқ дейиш — бу (уларнинг аҳамиятини) жуда осон баҳолаш билан баробар». «У туннелларни бутунлай самарасиз, деб аташдан йироқ бўлардим», — деган Икромов, сўзига далил сифатида ўткир ичак юқумли касалликлари билан касалланиш ҳозиргача 2019 йилга нисбатан 61 фоизга, гепатит А билан касалланиш эса 76 фоизга камайганлигини келтирган.
«Дезинфекция туннеллари бутунлай самарасиз деган ҳеч қандай расмий мақола ёки нуфузли идораларнинг кўрсатмаси, якуний хулосалар берилгани йўқ. Айрим манбаларда бундай туннеллар самарасиз деб кўрсатиляпти, бошқа манбаларда эса унинг ёндош юқумли касалликларга нисбатан самараси юқорилиги таъкидланмоқда», — деди Соғлиқни сақлаш вазирлиги ҳузуридаги Санитария-эпидемиологик осойишталик агентлиги бошқарма бошлиғи.
«Мактаб ва боғчаларда дезинфекция туннеллари ўрнатилмаслигига сабаб — болаларнинг шиллиқ қават пардалари катта одамларникига нисбатан нозик ва дезинфекцион эритмаларнинг уларга таъсири кучлироқ. Аммо қолган ҳолатларда, масалан, бозорлар, супермаркетлар, савдо мажмуаларига кириш жойларига ўрнатилган туннелларнинг зарари шу пайтгача ҳеч қаерда исботини топгани йўқ. Биз бундан ёрдамчи восита сифатида фойдаланишни давом эттиришимиз керак», — деди у.
Аввалроқ 6 сентябрь куни Соғлиқни сақлаш вазирлиги матбуот хизмати дезинфекция туннеллари коронавирусга қарши курашда энг фойдасиз чора эканлиги ҳақида хабар берган эди. Вазирлик Республика ихтисослаштирилган аллергология илмий-амалий тиббиёт маркази директори, профессор Илмира Розиқованинг сўзларига таяниб, дезинфекция туннелларини метро ёки бошқа муассаса бинолари олдида ўрнатиш шарт эмаслиги ҳақида ёзган эди.
Профессор Розиқованинг сўзларига кўра, дезинфекция туннеллари юқори нафас йўлларининг енгил қизаришидан то енгил куйишгача бўлган ҳолатларни келтириб чиқаради, бунинг оқибатида инсон аллергик ринит, конъюнктивит, бронхит, бронхиал астма каби касалликларга чалиниши мумкин. «Ҳозирда бундай нотўғри профилактика кўз конъюнктиваси ва юқори нафас аъзоларининг аллергик шикастланишига сабаб бўлмоқда», — дея Розиқованинг сўзларидан иқтибос келтирганди ССВ.
Маълумот учун, германиялик вирусолог, Бонн университети Вирусология ва ОИВни тадқиқ қилиш институти директори, профессор Ҳендрик Штрик дезинфекциялаш учун мўлжалланган туннеллар коронавирус инфекциясидан ҳимоя қила олмаслиги, аммо улар ротавирус ва бошқа контактли инфекциялардан ҳимоя қилиши мумкинлигини таъкидлаган эди.
Изоҳ (0)