Охирги бир сутка давомида бутун дунёда коронавирус билан касалланиш бўйича жами 304 626 та ҳолат қайд этилди. Бу ҳақда COVID-19 ҳақидаги статистик маълумотларни умумлаштириб бораётган Жонс Ҳопкинс университети маълумотларида баён қилинган.
Аввалги суткалик рекорд 14 августда ўрнатилган, шу куни 24 соат давомида 304 351 кишида COVID-19 коронавирус инфекцияси борлиги аниқланганди.
Дунё бўйича коронавирус инфекциясига чалинганлар сони 2020 йил 6 сентябрь соат 19:20 ҳолатига кўра 26 918 965 нафарга етган. Энг кўп касалланиш ҳолати АҚШда кузатилган (6 246 281 та). Иккинчи ўринни Бразилия (4 123 000), учинчи поғонани Ҳиндистон (4 113 811), тўртинчи ўринни Россия (1 022 228) ва бешинчи ўринни Перу (683 702) эгаллаган.
Дунёда касаллик асоратлари оқибатида вафот этганлар сони 880 341 нафарни ташкил қилмоқда. АҚШда 188 554 киши, Бразилияда 126 203 киши, Ҳиндистонда 70 626 нафар киши, Мексикада 67 326 киши ва Буюк Британияда 41 638 киши ҳаётдан кўз юмган.
Шунингдек, охирги бир сутка ичида дунёда 5637 нафар бемор вафот этган. Бу борадаги рекорд 14 август куни ўрнатилган ва шу куни 10 135 та ўлим ҳолати кузатилганди.
Август ойида Жаҳон соғлиқни сақлаш ташкилоти раҳбари Тедрос Адан Гебрейесус ер аҳолиси коронавирус пандемиясини енгиб ўтиши учун камида икки йил вақт талаб этилиши ҳақида гапирганди. ЖССТ бош директорининг сўзларига кўра шу муддатда касаллик устидан ғалаба қозониш учун дунё давлатлари ушбу эзгу мақсад йўлида бирдам бўлиб ҳаракат қилиши лозим.
Гебрейесус давлатларни инфекция тарқалиб кетишининг олдини олиш учун бор ресурсларни сафарбар қилишга чақирган. Шунингдек, у вакцинанинг инфекцияга қарши курашда асосий қурол бўлишига умид қилишини айтган.
ЖССТ раҳбари вакцинанинг яратилиши вируснинг тарқалишига бутунлай барҳам бериши ҳақидаги фикр нотўғри эканини таъкидлаган.
«Вакцина яратилган тақдирда ҳам, бу пандемиянинг тезда тугашини англатмайди», — деган эди Гебрейесус.
У одамлар касалликдан сақланиши учун инфекциянинг тарқалишига йўл қўймаслик чораларини кўриш кераклигини қайд этган.
Эслатиб ўтамиз, дунёда коронавирусга чалинганлар сони 3 август куни 18 миллионга, 7 август куни 19 миллионга, 10 августда 20 миллионга етган, 15 август куни эса 21 миллиондан, 19 август куни эса 22 миллиондан ошганди. 22 августда бу кўрсаткич 23 миллионга етган. 27 августда 24 миллиондан, 30 августда 25 миллион кишидан, 3 сентябрда эса бутун дунё бўйлаб коронавирус инфекцияси билан касалланганлар сони 26 миллион нафардан ошган.
Изоҳ (0)