Куз учун мақбул танлов: Бичими қоматни ихчам кўрсатадиган кўйлаклар (фото)

Гардеробини қандай услуб ва бичимли либослар билан янгилашни билмаётган аёл-қизлар учун, озғин кўрсатиш хусусиятига эга либослар сурати билан бўлишамиз. Ушбу моделларга ўхшаш либос харид қилиш ёки тиктириш хоҳишингизга ҳавола.

H&M брендидагидек тюл матосидан тикилган, оч ранглар умумлашмасидан ташкил топган либос, кузги романтик образ учун айни муддао. Бахмалли қалин «ободок», оқ ёки оч рангли ботфорт ёки «казаки» кийиш орқали янада қизиқарли кўринишга эга бўлишингиз мумкин. Тунги образ учун шунга ўхшаш либосни «полусапог» ва бахмал ёки чарм сумка билан мослаш тавсия қилинади. Кундаликда эса оч кроссовка, ёпиқ туфли, устингизга эса плаш ёки тренч кийсангиз бўлади.

«Снежная королева» бренди томонидан тақдим қилинган суратдагидек миди узунлигидаги либос кундалик кийиш учун универсал вариант ҳисобланади. Ҳеч қачон урфдан қолмайдиган мазкур принтли кўйлак, қалин «колготка», узун этик ва ботфорт билан чиройли кўринади. Либос устидан чарм куртка, узун классик услубдаги палто кийиш мумкин. Қолаверса, тадбир ёки зиёфатлар учун баланд пошнали туфли, иш ёки ўқиш учун эса қулай кроссовка ва oversize жинси куртка билан мосласа бўлади.

Мазкур бичимли кўйлак-либос билан турли образ яратса бўлади. Ўзини либос сифатида ёки шим билан кийиш, шунингдек, устки кийим сифатида фойдаланиш ҳам мумкин. Вертикал принт қоматни ихчам кўрсатади, белга урғу беради. Оёқ кийимлардан ботфорт, қалин кроссовка билан мослаш тавсия қилинади.

Майда гул принти туширилган либос нафақат ёзда, балки кузда ҳам долзарб. Stradivarius тақдим этган модель сингари либосни тўқ ранглар билан мослаб ўзига хос услубда кийиш мумкин. Қора туфли ёки боғичли ботинка билан кузга хос образ эгаси бўласиз.

«Запах» бичимли либос исталган қомат эгасига ярашади ва қоматни чиройли кўрсатади. Хантал ранги эса куз япроқларини эсга солади. Ингичка белбоғни, тўқ яшил қалин чарм камарга алмаштирса бўлади.

«Жиддий» услуб ва классик кўринишни хуш кўрадиганлар учун ушбу либос айни муддао. Мазкур моделни офисга ҳам кечки тадбирларга ҳам кийса бўлади. Бунинг учун аксессуар ва туфлини мослаш кифоя.

Мазкур либос эгасини янада жозибали кўринишига сабабчи бўлади. Уни замш ботфорт, палто ва шакли ўзига хос бўлган сумка билан мосланг. Ёки қалин ботинка ва oversize куртка кийиб, винтаж услубидаги кумуш ранг зирак тақинг. Бўйин қисмидаги тасмани бант қилиб боғлашингиз ёки шундайлигича қолдиришингиз мумкин.