Подиум ва урфда қандай услубда кийиниш долзарб бўлишидан қатъий назар ҳар бир аёл ўз қомати, бўйидан келиб чиққан ҳолда танлов қилиши керак. Чунки нотўғри кийиниш нафақат дидсиз, балки қоматни аслидан ҳам тўлароқ кўринишига сабаб бўлади.
Калта шим
Сўнгги йилларда трендда бўлиб келган узун бўлмаган шимларнинг турли моделлари бор. Аммо бундай шимни қомат пропорцияси бузилмаслиги учун ¾ узунлигидагисини танламаслик тавсия қилинади. Чунки тиззадан узунроқ турадиган модель билан бўйингиз паст, бўкса эса кенг кўриниши мумкин.
Қоматни беркитишга уриниш
Қоматидан кўнгли тўлмаган аёллар кенг кийим-кечак билан камчиликларни беркитмоқчи бўлади. Аммо қоматдан келиб чиқиб танланмаган oversize билан янада қўполроқ кўриниш ёки кутилган натижага эриша олмаслик мумкин. Агар белингиз ингичка эмасдек туюлса, кенг либос кийиб унга урғу бериш учун аксессуарлардан: камар ва белбоғдан фойдаланинг.
Ҳаддан ортиқ тор кийим
Либос, топ ва бошқа кийимларни танлаганда ҳаддан ортиқ тор эмаслигига эътибор қаратиш керак. Чунки бундай бичимли либослар камчиликларни кўзга ташланишига сабаб бўлади.
Oversize ва яна oversize
Oversize’нинг трендда экани ва у билан қизиқарли образ яратиш ҳатто тўғри танланса қоматни чиройли кўрсат мумкинлиги аниқ. Лекин тепа қисмига ҳам пат қисмига ёки устидан ҳам кенг кийимни бир вақтни ўзида кийиш биринчидан қўпол, иккинчидан эса дидсиз кўринишга сабаб бўлади. Устингизга oversize кийсангиз, белни акс эттирадиган жинси, юбка ёки шортик кийинг. Агар шимингиз ёки юбкангиз кенг бўлса, тепа қисмингизга кенг бўлмаган топ ёки свитер кийиш тавсия қилинади.
Принтли шим
Принтли шимларни танлашда эътиборли бўлиш, нақшлар тўлароқ кўрсатишини ҳисобга олиш керак. Агар сиз ўз вазнингизда ҳам тўла кийинишни истамасангиз, унда нақш ва принтли ранг баранг либосларни харид қилишда қочинг.
Қават-қават кийиниш
Дизайнерлар томонидан кийим устидан кийим кийиш подиумларда қўлланилаётгани ҳақиқат. Совуқ кунларда бундай кийинишнинг афзалликларини инкор қилиб бўлмайди, аммо ҳамма нарсанинг меъёрини билиш ва инсон ўз қоматини объектив баҳолай олиши зарур. Қават-қават кийинишни буткул ташлаш тавсия этилмайди, шунчаки мато қалинлиги, бичимига эътиборли бўлиш керак. Масалан, свитер устидан кўйлак кейин бўлса куртка кийиш мумкин, лекин кенг свитер устидан oversize пиджак, елкаси кенг куртка кийиш сизни семиз кўрсатиши аниқ.
Бўйин қисмини ёпиқ либос
Доим қизиқарли образ яратиш мумкин бўлган ҳеч ҳам урфдан қолмайдиган водолазка кийишда, бўйин калта кўрсатиши мумкинлигини инобатга олиш керак. Кийиниш борасидаги бундай хатони Брижит Макроннинг кийиниш услубида кузатиш мумкин. Бўйни ёпиқ либослар қоматни аслидан тўлароқ кўрсатиш хусусиятга эга. Ёқали, бўйин қисми V шаклидаги либослар эса аёл кишини янада латофатли ва жозибали кўрсатади.
Нотўғри узунликдаги юбка
Либос ёки кўйлак узунлигининг тўғри экани нафақат трендлар, балки қомат ўлчамлари билан боғлиқ бўлади. Узунлиги тўпиқдан бироз юқорироқда турадиган узунликдаги юбка ҳатто бўйи 180 бўлган аёл ёки қизни ҳам паст бўйли кўринишига сабаб бўлади. Агар сиз узун либосларни ёқтирадиган бўлсангиз эътиборингизни миди узунлигига қаратиш тавсия қилинади.
Сифатсиз трикотаж
Сифатсиз мато образ ҳақида нотўғри хулоса чиқаришга сабабчи бўлади. Юпқа ва шилдираган трикотаж, сиз яширишни истаган қоматингиздаги камчиликларни кўзга ташланишига олиб келади. Шунинг учун тор либосдан образ яратишни истасангиз қаттиқ матоли кийимлар, кенг либослар учун эса юмшоқ матодан тикилган либосларга эътибор қаратинг.
Изоҳ (0)