Иш ёки ўқишга кетишдан аввал кўзгуга разм ташлаганда либосдан кўнглимиз тўлдими ёки йўқ, шунга қараб кийинамиз. Лекин қомат қанчалик мукаммал бўлмасин баъзи кийим-кечаклар ва эътибор берилмайдиган жиҳатлар тўлача ва паст бўйли ҳамда дидсиз кўринишга сабабчи бўлади. Бу кабилардан қочиш учун қандай кийимларни гардеробдан чиқариб ташлаш керак? Стилист Юлия Мореходова ушбу саволга жавоб беради.
Белдан пастда турадиган тор бичимли шим
Скинни, яъни тор шим озғинроқ кўрсатади деган тушунча ҳар доим ҳам ўзини оқлайвермайди. Масалан, калта кенг свитер билан скинни шим кийилса, қомат чупа-чупсга ўхшаб қолади. Тор шим билан ёпишиб турадиган трикотаж кофта ҳам совуқ ўтказмайдиган ички кийимдек кўриниши мумкин. Ушбу моделни белдан паст турадиганини олиш эса умуман тавсия қилинмайди, чунки қомат одатдагидан гавдалироқ, оёқлар калтароқ, тананинг тос қисми ва сонлар кенг, тиззадан пастки қисм эса номутаносиб ингичка равишда кўринади. Скинни кийишни истаганларга кенг ва узунроқ кардиган ёки пиджак билан мослаш тавсия қилинади. Свитер ёки блузка тор бўлмаслиги керак, ана шундагина аёлларга хос жозиба ва нозиклик акс этиши мумкин.
Енгсиз блузка
Енги йўқ блузка кийганда қўлнинг юқоридаги тўла қисми ва елкалар эътиборни тортади. Агар қўлингизни юқори қисми тўлача бўлса, бундай кийиниш янада кўзга ташланишга сабаб бўлади. Қолаверса бундай модель, образни юзаки кўринишига сабабчи бўлади. Шу боис енгсиз модель ўрнига калта бўлса ҳам енги бор вариантни танлаш, классик енгли кофтани бўлса тирсаккача ¾ қилиб қайириш ё бўлмаса фонар енгли романтик моделга эътибор қаратиш тавсия қилинади.
Юпқа трикотаж кўйлак
Кўйлак, жемфер, кардиган — қандай кийим-кечак бўлишидан қатъи назар, трикотажнинг юпқаси дидсизликдан дарак берибгина қолмай, қоматдаги камчиликларга эътибор қаратади. Бундай либосни ўзини киймаслик, кийганда ҳам жинси куртка, кардиган ёки пиджак ичидан мослаш керак. Бу орқали сиз бир ўқ билан икки қуённи урган бўласиз — кийинишингиз замонавий ва қизиқарли бўлади, қоматингиздаги камчиликлар эса устки кийим ичига яшириниб, кўзга ташланмайди.
Горизонтал йўл-йўл принтли шим
Бундай моделлар камдан кам бўлса ҳам баъзи брендларнинг ёзги коллекцияларида учраб туради. Гап шундаки, йўл-йўл вертикал эмас, горизонтал қилиб туширилган принт қоматни, хусусан, белдан пастки қисмни кенг ва тўла қилиб кўрсатади. Бундай моделдаги шимларни елкаси тос суягидан кенг бўлган аёл-қизлар кийиши ва бу орқали қоматни пропорсионал кўринишига эришиши мумкин. Бошқа қомат эгаларига эса ўзларидаги камчиликларни инобатга олган ҳолда либос танлаш ва мода экан деб ҳар нарсани харид қилавермаслик тавсия қилинади.
Ботильонлар
Ботильонларни исталган пойабзал дўконида топиш ва турли ранг ва моделдагиларни танлаш мумкин. Лекин харид қилишга шошилмаслик ботильонларнинг калта бичимлиси қомат ва бўйни бошқача кўрсатишини унутмаслик керак. Бундай моделларни кўйлак, юбка ва калта шим билан кийиш орқали оёқларни калта кўринишига сабабчи бўлиш мумкин. Калта ботильонлар билан кийилган юбка тўпиқдан тўрт-беш бармоқ тепада бўлиши ёки танлов миди узунлигидаги плиссировкали либосда тўхташи керак.
Изоҳ (0)