Ўзига хос кийиниш учун мавсумнинг сўнгги тренддаги либосларини кийиш шарт эмас. Қандай либосда ўзингизни қулай ҳис қилишингизни тушуниш ва уни мавжуд тенденциялар билан уйғунлаштира олишнинг ўзи кифоя.
Сифатли мато
Либос, таниқли бренд ёки масс-маркетдан экани муҳим эмас, образни арзон кўринмаслиги аниқ бир марка эмас сифатли мато ва тартибли ташқи кўриниш билан боғлиқ бўлади. Шу боис хариддан олдин ёрлиқларни эътибор билан ўқиш, табиий матоли либосларни танлаш ва шу билан бирга эскирган либосларни вақти билан ўзгартириб туриш тавсия қилинади.
Гардеробдаги уйғунлик
Гардеробингизда сизга ярашадиган ва кийганда ўзингизни қулай ва гўзал ҳис қилган либослар ўрин олган бўлиши керак. Гардеробингизни кўздан кечиринг, мавжуд либосларни мослаб замонавий образ яратинг, етишмайдиган нарсаларни харид қилинг. Турли услубда кийинишни яхши кўрган тақдирингизда ҳам гардеробдаги либослар бир концепция асосида бўлиши керак. Мос бўлмайдиганларини яхшиси олиб ташланг.
Мавсум трендлари
Трендда бўлиш учун брендларнинг сўнгги коллекциядаги либосларини харид қилишга ҳожат йўқ. Ўз услубингизни замонавий реалликка мослашнинг ўзи кифоя. Блогерлар тавсия қилган ҳар қандай либосни харид қилишга ошиқманг. Энг аввало долзарб бичим, ранг ва гардеробингиздаги либослар билан қанчалик уйғун бўлишига диққатингизни қаратинг. Тренд кетидан қувманг — ўз услубингизни ўзингиз яратинг.
Жойига қараб кийиниш
Сиз ультраурфдаги либос эгаси бўлишингизга қарамай борган жойингизга мувофиқ кийинмаган бўлсангиз бари бефойда. Сиз яқиндагина харид қилган ва қачондан бери кийишни кутганингиз учунгина кийилган қизил пир-пиракли кўйлак расмий учрашув учун умуман мос бўлмаслиги мумкин. Шу сабаб мавсумга, жойга ва борадиган учрашув форматига қараб кийининг.
Аксессуар ва деталлар
Ҳатто кичик деталлар ҳам образнинг қандай кўринишида рол ўйнаши мумкин. Бунинг учун қиммат тилла ёки бриллиантдан бўлган тақинчоқ бўлиши шарт эмас, кийим ва кийиниш усулига мос тақинчоқнинг ўзи кифоя. Эсда қоларли ва ўзига хос кўринишга эга бўлиш учун сумкаларнинг ҳам аҳамияти катта. Камар, бош аксессуарлари, кўзойнак, шарф ва бошқа деталлар ҳам образ учун зарур ҳисобланади.
Изоҳ (0)