Коронавирусга қарши кураш штаби аъзоси Барно Абдусаматова гриппга қарши эмлаш коронавирусдан ҳимоя қилиши борасидаги саволларга аниқлик киритди.
Гриппга қарши вакцина одамларни COVID-19’дан ҳимоя қилмаслиги, балки гриппнинг ривожланиш хавфи, у билан боғлиқ асоратлар, жумладан, касалхонага жойлаштирилиш ва ҳатто ўлим хавфини камайтиришини айтилди.
«COVID-19 грипп мавсумида, яъни куз-қиш фаслида хавфлироқ бўлади, шунинг учун гриппга қарши вакцина қабул қилиш ҳозирги даврда ҳар қачонгидан ҳам муҳимроқ. Бу фармкомпаниялар ўйини ёки мажбурий вакцинация ҳам эмас, лекин биз эмлашни тавсия этамиз», — дейди мутахассис.
Мавзуга доир: Ўзбекистонда куз фаслида коронавирус пандемиясининг иккинчи тўлқини бошланиши мумкинми? Мутахассис жавоб берди
Гриппга қарши эмлаш даражасининг кўпайиши ушбу фаслларда аҳоли орасида нафас йўли касалликларини камайтириши мумкинлиги, шунингдек, пандемия пайтида соғлиқни сақлаш тизимига бўлаётган зўриқишнинг олдини олиши таъкидланди.
Аввалроқ Ўзбекистон Соғлиқни сақлаш вазирлиги ҳузуридаги Коронавирусга қарши курашиш штаби аъзоси, эпидемиолог Рустам Икромов аҳолини грипп ва пневмонияга қарши эмлаш бўйича чора-тадбирлар режаси ҳукуматга тақдим этилгани, агар режа тасдиқланса, сентябрь ойидан эмлаш ишлари бошланишини билдирган эди.
Бундан ташқари, Юнусобод туманидаги 50-оилавий поликлиника бош шифокори Шоира Абдусатторова туман ҳокими раҳбарлигида ўтказилган йиғилишда туман аҳолисининг камида 70 фоизини гриппга қарши оммавий эмлашга келишиб олинганини маълум қилган эди. Унинг айтишича, 2018 ва 2019 йилларда Юнусободда аҳолининг фақат бир фоизи гриппга қарши эмланган. Коронавирусга қарши кураш штаби аъзоси Ҳабибулло Оқилов эса гриппга қарши мавсумий эмланишнинг коронавирусга ҳеч қандай алоқаси йўқлиги ва агар эмлаш вақтида бирор қўллашга қарши кўрсатмалар бўлмаса, одатий тартибда қилиниши мумкинлигини айтган.
Изоҳ (0)