Тошкентда 5 ёшли қизини уриб ўлдириб, сўнг мурдасини ўчоқда ёқиб, жасад ёнмай қолгандан сўнг эса унинг суякларини Чирчиқ дарёсига ташлаган эр-хотинга суд ҳукми ўқилгани ҳақида хабар берилганди. Суд ҳукми билан 5 йилга озодликдан маҳрум қилинган эр воқеа қандай бўлганини сўзлаб берди. Бу ҳақда «Даракчи» хабар қилди.
«Хотиним билан 2015 йил Москвада танишимнинг туғилган кунида танишганмиз. У менга икки нафар фарзанди борлиги, уларни боқишга қийналиб қолганини айтди. Шундан сўнг яқинроқ танишиб, 2015 йил шаръий никоҳ билан турмуш қурдик. Турмушимиз давомида икки нафар ўғил фарзандли бўлдик.
Унинг биринчи турмушидан уч нафар фарзанди бор эди. 2019 йил биринчи турмушидан бўлган тўнғич ўғлини никоҳ тўйида иштирок этиш ҳамда ўғилларим тез-тез касал бўлгани сабабли Ўзбекистонга қайтиб келганмиз. Намангандаги уйимда биринчи оилам ва ўғилларим яшагани учун бу аёл билан Тошкентда яшашга қарор қилганмиз.
Қурилишда ишлаб юрганимда хотиним қўнғироқ қилиб, фарзанди касал бўлиб қолганини айтиб, уйга келишимни сўради. Бошлиқдан рухсат сўраш билан бирга бироз дори-дармон олиш учун пул ҳам сўрадим. Пул эмас, рухсат берди.
Уйга киришим билан биринчи турмушидан бўлган қизини ўлдириб қўйганини айтди. Нима бўлганини тушунмай, бола ётган хонага кирдим. Қизалоқ ерга ётқизилган, устига ёпинчиқ ташлаб қўйилганди. Ёпинчиқни очиб, унинг юзига бир-икки енгил шапалоқ урганимда юзи қотиб қолганини билдим.
Нима бўлганини сўраганимда воқеа тафсилотларини айтиб берди. Шунда онангга қўнғироқ қилиб, муаммони ўзларинг ҳал қилинглар, дедим. Хотиним кичик ўғлимизни маҳкам ушлаб, одамлар онаси қизини ўлдирибди, дейишгач, катта қизимни ҳеч ким сўрамай қўяди. Агар онамга қўнғироқ қилсангиз, кичик ўғлимни ҳам ўлдираман, деди.
Биринчи ўғил фарзандим туғилганида шифокорлар хотинимнинг руҳияти яхши эмаслигини айтгани эсимга тушди. Шу сабабли унга нима қилсанг қил, боламни қўйиб юбор, дедим. Сўнг қизимнинг мурдасини йўқ қилишда ёрдам беринг. Онамга қўнғироқ қилманг, ҳаммасига ўзим жавоб бераман, деди. Ноилож рози бўлдим.
Бироздан сўнг егулик олиш мақсадида хотиним ва болаларим билан биргаликда кўчага чиқдик. Хотиним бир шиша ароқ ҳам сотиб олди. Пулни қаердан олганини сўрасам, зирагимни 350 000 сўмга сотдим, деди. Уйга киргач, ароқ ичиб ўзига келганини айтди. Ўғилларим жувонмарг бўлиб кетмасин. Қамалиб кетсак, кимларни қўлида хор бўлишади? Ўз фарзандимнинг қотили бўлиш — иснод, дея анча вақт йиғлади. Бироздан сўнг музлатгичдан пиво олиб ичди.
Хотиним телефон ва калитларимни олиб қўйди. Эртаси куни хотиним ва фарзандларим билан яна кўчага чиқиб, қизнинг мурдасини кўмиш учун жой қидирдик. Лекин жой топа олмадик. Россияда бўлган вақтимизда шашлик қилиш учун ўрмонга ўхшаш жойларга бориб турардик. Хотиним ҳам шашлик қилиш баҳонасида тоғга чиқиб, ўша ерларга кўмиб келишни айтди.
Дўстлик-2 мавзесига бориб, у ерда ташландиқ жойларни кўриб келдик. Лекин у жойларга ҳам кўмишнинг имкони бўлмади. Йўлда хўжалик моллари дўконидан бир дона сопсиз белкурак ва бир шиша ўт олдириш учун ёқилғи сотиб олдик. Уйга келиб, интернет орқали Бўстонлиқдан дала ҳовли қидириб, бир кеча тунаб қолиш учун маклер билан 250 000 сўмга келишдик.
Хотиним боласининг мурдасини сумкага жойлаштирди. Такси келганидан сўнг биргаликда йўлга чиқдик. Илгари гаплашган дала ҳовлимизни бошқаларга ижарага бериб юборилганини билдик. Ўша ердаги нотаниш маклер ўзининг дала ҳовлисини бир кечага 250 000 сўмга беришини айтди.
Қоровулига паспортимни бериб, ҳовлига жойлашдик. Мурда солинган чамадон эса дарвозахонада қолди. Сўнг хотиним ва фарзандларим билан яқин атрофдаги дўконга бориб, тухум, картошка, бир шиша ароқ сотиб олдик. Биргаликда ароқ ичдик.
Шу куни тунда хотинимга мурдани янги қурилаётган дала ҳовли атрофига кўмишни таклиф қилдим. Нима қилишни ўзим биламан, мурдани кўммайман. Агар итлар ковласа, очилиб қолади. Энди ишингиз бўлмасин, деди. Эртаси куни тонгда мени уйғотиб, мурда сасиб кетяпти, деди. Шунда мурдани ўчоқ бошига олиб бориб ёқаётганини кўрдим. Мурда ўчоққа жойлаштирилган, устидаги қозонда сув қайнаётганди. Нималар қилиб қўйдинг, дея ўша ердаги қўлқопни қўлимга кийиб, қозонни олдим. Мурдани устига сув сепиб ўчирдим.
Дала ҳовлига мурдани кўмиш учун боргандик, лекин хотиним нима сабабдан ёққанини билмайман. Хотиним энди бу жиноятда иккаламиз шерикмиз, биргаликда жавоб берамиз, деди. Хотиним дўкондан полиэтилен қоп олиб келди. Нима қилишини сўраганимда мурданинг қолдиқларини қопга солиб, йўқотиб келаман, деди. Бундай қилмаслигини айтганимда энди менга шериксиз. Хоҳласангиз ташлаб келамиз, хоҳламасангиз ҳеч нарса қилманг, деди. Шунда ноилож мурдани қопга жойлаштириб, оғзини маҳкамлаб боғладим.
Хотиним ва фарзандларим билан Чирчиқ дарёси бўйига бордик. Қопни сув бўйига олиб тушдим, ичига 2-3 дона тош солиб, оғзини боғлаб, сувга ташлаб юбордим.
Автобусда Тошкентдаги метрогача келиб, хотинимнинг қистови билан чамадонни шу ердаги ахлат қутисига ташлаб, ‘маршрутка’да уйга кетдик. Шу орада уй эгаси уйимни бўшатиб қўйинглар, деб талаб қилди. Ижарага уй қидириб, ижара ҳақи қимматлигини билиб, хотинимга қўнғироқ қилдим. У ҳовли ёки бир хонали квартира топинг. Қизим йўқолиб қолгани ҳақида ИИБга ариза ёзиб, онамга хабар бердим, деди. ИИБ ходимларига эса бўлган ҳолатни айтиб бердим», – дейди қотил аёлнинг эри.
Суд ҳукмига кўра, аёлга 13 йил озодликдан маҳрум қилиш жазоси тайинланди. Унинг эри эса айбсиз деб топилиб, реабилитация қилинган ҳамда 5 йил муддатга озодликдан маҳрум қилиш жазоси тайинланган.
Ҳукм ўқилган бўлса-да, қотил она ўз айбини тан олмаган. 5 ёшли қизалоқнинг суяклари аёлнинг онасига дафн этиш учун берилган.
Изоҳ (0)