Ўзбекистонда бир нафар бола Кавасаки синдромига гумон қилинган — Коронавирусга қарши курашиш штаби аъзоси

Коронавирусга қарши курашиш штаби аъзоси Барно Абдусаматова ривожланган мамлакатларда болалар орасида учраган Кавасаки синдроми Ўзбекистонда ҳам кузатилгани хусусидаги саволга жавоб берган.

«Ҳозирги кунга қадар Ўзбекистонда Кавасаки синдроми кузатилмади. Бир нафар бемор болада ушбу синдром гумон қилинган эди, лекин текширувлар натижасида инкор этилган», — дейди мутахассис.

Шунингдек, Жаҳон соғлиқни сақлаш ташкилоти (ЖССТ) раҳбари Тедрос Адан Гебрейесус барча мамлакатлардаги шифокорлардан коронавирус юқтириб олган болаларда Кавасаки синдроми (мултисистемали яллиғланиш) аломатлари пайдо бўлаётганига алоҳида эътибор қаратиш кераклигини айтганини таъкидлаган. Сўнгги пайтларда Европа, Корея ва Шимолий Америкадан келаётган хабарларда интенсив терапия бўлимларига мултисистемали яллиғланиш ҳолатига тушиб қолган, Кавасаки синдромига ва заҳарли шок синдромига ўхшаш аломатларга эга болалар ётқизилаётгани билдирилган. Маълумотларга қараганда бу синдромнинг ривожланиши айнан коронавирус билан зарарланиш оқибатида юзага келган бўлиши мумкин.

Аввалроқ АОКА ҳузуридаги штабнинг яна бир аъзоси Севара Убайдуллаева Кавасаки синдроми генетик касаллик бўлиб, у асосан 4-5 ёшгача бўлган болаларда учрашини айтган. Жуда ҳам кам учрайдиган ушбу хасталик бола организмининг тизимли ўзгариши билан кечади.

Бугунги кунда Россия ва Қозоғистонда ҳам болаларда бу синдромга ўхшаш ҳолатлар кузатилаётгани ҳақида маълумотлар бор.

Ўзбекистонда бу касаллик учрамади дейишимиз қийин, балки болаларда кечган ўрта оғир турларида бу касаллик белгиларига ўхшаш ҳолатлар кузатилган бўлиши мумкин. Бизда бу синдром учради, дейишимиз учун касаллик тасдиқланиши керак. Бугунги кунда бу синдромга ўхшаш ҳолатлар аниқ ўз тасдиғини топмади. Бироқ бу кузатилмайди дегани ҳам эмас, Кавасаки синдромига ўхшаш касалликлар болаларда кузатилиши ва кўпайиши ҳам мумкин, деган Убайдуллаева.

Бу синдром коронавирус таъсирида бола организмида кечадиган кучли яллиғланиш, қон-томирлар ўтказувчанлиги бузилишини келтириб чиқаради. Шунингдек, боланинг тана ҳарорати беш ва ундан ортиқ кунларда 38 даражадан юқори бўлади, танасига турли тошмалар тошади, қўллар кафти ва товон терисининг кўчиши кузатилиши мумкин.