Венесуэла президенти Николас Мадуро АҚШ президенти Дональд Трамп унинг ўлдирилишини маъқуллаганини айтди. Telemundo 49’нинг хабар беришича, бу ҳақда Мадуронинг ўзи Twitter’да тўғридан-тўғри намойиш этилган чиқишида маълум қилган.
Унинг сўзларига кўра, АҚШ ҳукумати унинг калласи учун 15 миллион доллар мукофот ваъда қилган. Шунингдек, Мадуронинг қайд этилишича, АҚШ уни ўлдиришга ёллаш учун снайперларни қидирмоқда, Венесуэланинг ўзида ҳам бунинг учун ёлланма аскарларни топишга ҳаракат қилмоқда.
Президент уни йўқ қилиш ҳақидаги қарорни шахсан Трамп чиқарганини таъкидлаган.
Эслатиб ўтамиз, АҚШ 2020 йилнинг март ойида Мадурони гиёҳванд моддалар савдосида айблаган ва унинг айбини исботловчи далиллар учун 15 миллион доллар мукофот пули ваъда қилинганди. Венесуэла мухолифати эса Американинг Silvercorp хусусий ҳарбий компанияси билан мамлакатга бостириб кириш ва президент Николас Мадурони ҳокимиятдан ағдариш бўйича 213 миллион долларлик келишув имзолаган. АҚШ давлат котиби Майкл Помпео эса ёлланма жангариларнинг Венесуэлага бостириб киришга уринишига АҚШнинг алоқадорлигини рад этган.
Изоҳ (0)