Россия Ҳиндистон компаниялари билан коронавирусга қарши «Спутник V» вакцинасининг 300 миллион дозасини ишлаб чиқариш бўйича келишув имзолади. Бу ҳақда Россия тўғридан-тўғри инвестициялари жамғармаси раҳбари Кирилл Дмитриев маълум қилган, деб ёзмоқда «РИА Новости».
«Ҳиндистонлик экспертлар Россия вакцинасининг кучини кўрди. Ҳиндистон компаниялари билан бир йил ичида 300 миллиондан зиёдроқ дозада вакцина ишлаб чиқариш юзасидан келишув имзоладик», — деган Дмитриев.
Шунингдек, жамғарма директори Россиянинг Ҳиндистон томонидан берилган вакцина бўйича барча масалаларга жавоб қайтарганини қўшимча қилган.
«Ҳиндистонлик олимлар бизни қўллаб-қувватламоқда ва ушбу мамлакат билан муносабатларимиз яхши. Ҳиндистонни бутун дунёга вакцина етказиб бера оладиган ишлаб чиқариш қувватига эга деб ҳисоблаймиз. Биз берилган барча саволларга жавоб қайтардик, асосий савол, яъни илмий мақола қачон чоп этилишига ҳам ойдинлик киритилди. Мақола ғарбнинг катта нашрларидан бирида эълон қилинади. Тадқиқотларнинг рўйхатдан ўтгандан кейин ҳам давом этгани юзасидан ҳам савол чиқди. Шу ҳафтанинг ўзида Россияда 40 мингга яқин рўйхатга олиш билан параллел равишдаги тадқиқотлар амалга оширилди», – деган у.
Дмитриев Россия турли мамлакатлардан коронавирусга қарши миллиарддан зиёд дозадаги вакцина буюртмасини олгани ҳақида ҳам гапирган.
«Ҳиндистон билан ҳамкорликда ушбу вакцинани ишлаб чиқаришни бошласак, уни дунёнинг асосий етакчи мамлакатларига ҳам етказиб бера оламиз. Бу текширилган, одам учун хавфсиз аденовирус технологияси ва биз турли давлатлардан миллиарддан зиёд дозага буюртма олдик. Аввал ҳам айтганимдек, Ҳиндистон билан бир йил ичида 300 миллион дозани ишлаб чиқаришимиз мумкин», – дейди россиялик амалдор.
Россия Соғлиқни сақлаш вазирлиги август ойида COVID-19 коронавирус инфекциясининг олдини олишда ишлатиладиган дунёдаги энг биринчи вакцинани рўйхатдан ўтказган. Гамалея институти олимлари ишлаб чиққан «Спутник V» синовлари давом этаётган паллада параллел равишда тезкор тартибда гувоҳнома олгани маълум қилинганди.
Эслатиб ўтамиз, Россиянинг Гамалея институти томонидан яратилган коронавирусга қарши икки компонентли вакцина 11 август куни вақтинчалик рўйхатдан ўтиш гувоҳномасини олган. Вакцина тўлиқ самарадорлик тадқиқотини ўтказиш шарти билан рўйхатдан ўтказилган ва гувоҳнома 2021 йил 1 январга қадар амал қилади.
Вакцинани яратиш ва тадқиқ қилиш ишларини молиялаштирувчи Россиянинг тўғридан-тўғри инвестициялар жамғармаси раҳбари Кирилл Дмитриев Россияда коронавирусга қарши оммавий эмлаш 2020 йил октябрь ойидан бошланишини айтган. Кейинчалик Россияда хавф гуруҳига кирувчи кишиларни коронавирусга қарши оммавий эмлаш 2020 йилнинг ноябрь—декабрь ойларида бошланиши ҳақида хабар берилди.
Изоҳ (0)