Литва ҳукумати Беларусь халқини қўллаб-қувватлаш бўйича махсус режани тасдиқлади. Бу ҳақда Литва Ташқи ишлар вазири Линас Линкявичус маълум қилди, деб ёзмоқда «Интерфакс».
Вазирнинг сўзларига кўра, режанинг мақсади «таъқиблардан жабрланганларга ёрдам бериш, беларусликларга Литва олий таълим муассасаларида ўқишга, Литва визасини осонлаштирилган тартибда олишга ва Литва меҳнат бозорига интеграция бўлишга ёрдам кўрсатиш ҳисобланади».
Август ойида вазир Литва беларусликларга инсонпарварлик асосларида бошпана беришга тайёрлигини маълум қилган.
«Литва давом этаётган шафқатсиз муносабатдан жабрланаётган беларусликларни инсонпарварлик асосларида қабул қилишга тайёр ва бу имкониятларни кўриб чиқмоқда», — дея ёзган вазир ўзининг Twitter’даги саҳифасида.
Литва Ички ишлар вазири Рита Тамашунененинг маълум қилишича, мамлакат ҳукумати Беларуснинг 64 нафар фуқаросига инсонпарварлик истисносидан фойдаланишга ва мамлакатга келишга рухсат берган.
Литва президенти маслаҳатчиси Божена Заборовска-Эдановичнинг маълум қилишича, Литвага келишга рухсат олган беларусликларнинг фақат 21 нафари бу имкониятдан фойдаланган, қолганлари эса Литвага келишга тайёрланмоқда.
Бундан ташқари, Беларусдаги президентлик сайловидан кейин яна 11 киши сиёсий бошпана сўраган.
Аввалроқ Латвия, Литва ва Эстония Александр Лукашенко ва яна 29 нафар беларуслик мансабдорга нисбатан санкция жорий қилганди.
Эслатиб ўтамиз, Беларусда 9 август куни бўлиб ўтган сайловда мухолифат номзоди сифатида қатнашган Светлана Тихановская 11 август куни Беларусдан Литвага чиқиб кетган. Литва ҳукумати Светлана Тихановскаяга бошпана ва қўриқчилар тақдим этган.
Изоҳ (0)