Беларусь президенти Александр Лукашенко мамлакатда мухолифат ҳокимият тепасига келадиган бўлса, қирғинбарот жанглар бўлиши ва давлат парчаланиб кетиши мумкинлиги ҳақида гапирди. Бу ҳақда БелТА хабар берган.
«Ўз ватанимнинг бўлиниб кетишини истамайман, мен мамлакатни империя бўлакларидан қайта тиклаганман, бунга меҳнати сингган ҳалол, тартибли одамларнинг қурбон бўлишини хоҳламайман. Бу баъзилар айтаётгандек эски ҳукуматни вақтинча четлатиш эмас. Бу қирғинбарот жанг», — деган Лукашенко.
Шунингдек, у Украинада бўлиб ўтган воқеалар Беларусда содир бўлиши мумкин бўлган ҳодисалар олдида ҳеч нима эмаслигини қайд этган.
Беларусда бўлиб ўтган президентлик сайловларининг натижаларини бекор қилиш юзасидан халқ норозилик намойишлари давом этаётганига уч ҳафтадан ошди. Беларусь МСК маълумотига кўра Александр Лукашенко 80,1 фоиз овоз билан сайловларда ғолиб чиққан, мухолифат вакили Светлана Тихановская эса 10,1 фоиз овоз олган. Мухолифат расмий натижаларни тан олмаган ва амалдаги президент Лукашенконинг истеъфога чиқарилиши ва сайловларнинг қайтадан ўтказилишини талаб қилмоқда.
Тихановская 14 августда Беларусь мухолифатининг мувофиқлаштирувчи кенгаши тузилганини эълон қилган. У кенгашга ҳукумат ва норозилик намойиши ўтказаётган халқ ўртасидаги низонинг ҳал этилишини истаган барча бирлашмаларнинг вакиллари кириши мумкинлигини гапирган.
Лукашенко кенгашнинг тузилганига муносабат билдириб, буни ҳукуматни ноқонуний йўл билан эгаллашга уриниш деб атаган. Беларусь конституцион суди кенгаш фаолиятини қонунларга зид деб топган. Кенгашга нисбатан Беларусь Жиноят кодексининг 361-моддаси билан (миллий хавфсизликка таҳдид қиладиган ҳаракатларни амалга ошириш, ушбу ҳаракатларни қилишга чорлаш) бўйича иш қўзғатилган.
Изоҳ (0)