ЖССТ Швециянинг коронавирусга қарши стратегиясини бошқа мамлакатларга намуна қилди

Швециянинг коронавирус пандемиясига қарши кураш сифатида юмшоқ чекловларни жорий этиш стратегияси, узоқ муддатли истиқболда, бошқа мамлакатлар учун намуна бўлиши лозим. Бу ҳақда ЖССТнинг махсус вакили доктор Дэвид Набарро Янги Зеландиянинг Magic радиостанциясига берган интервьюсида маълум қилди.

Унинг сўзларига кўра, ҳукумат ва аҳоли ўртасидаги ишонч COVID-19’ни мағлуб этишнинг калитидир. Бу борада «ҳукумат жамиятга, жамият эса ҳукуматга ишона олган» Швецияни мисол тариқасида келтирди.

Набарро ушбу давлат ҳукуматининг коронавирус тарқалишига қарши курашдаги ёндашувини ҳақ йўл ва халқ томонидан тўғри қабул қилинган деб атади. Унинг сўзларига кўра, Стокгольм фуқароларнинг виждонига таянган ва қатъий карантин чораларини кўрмаган. Бошқа мамлакатлар ҳам келажакда шундай сиёсатга амал қилиши лозим.

ЖССТ махсус вакилининг фикрича, қатъий карантин — бу фуқаролар ва кичик бизнес даромадларига жиддий таъсир кўрсатадиган «қўпол восита».

Июнь ойида Янги Зеландия ҳукуматининг илмий маслаҳатчиси, профессор Майкл Бейкер Швеция ҳукумати COVID-19 касаллигига қарши кураш учун қаттиқ карантин чораларини қўллашдан бош тортиб хатога йўл қўйган деб айтганди. Ундан аввал Италиянинг Падуа университети молекуляр тиббиёт кафедраси профессори, вирусолог Андреа Крисанти Швеция ва Беларуснинг коронавирус бўйича стратегиясини оқилона бўлмаган қарор деб атаган эди.

Швециянинг бош эпидемиологи Андерс Тегнелл биринчи марта омма олдида у томонидан таклиф қилинган коронавирусга қарши кураш стратегияси хато бўлганини ва жуда кўп ўлимга олиб келганини тан олган.

Кейинчалик, Bloomberg суҳбатлашган экспертлар, Швеция иқтисодиёти ҳукуматнинг 2020 йил февраль—май ойларида қаттиқ чеклов чораларидан бош тортишидан кўпроқ ютди деган хулосага келган. Capital Economics мутахассиси Дэвид Окслининг фикрича, Швеция ЯИМи 7 фоизга қисқариши кутилмоқда, Европанинг бошқа мамлакатлари иқтисодиёти эса 30 фоизгача тушганини кўрсатмоқда.

Июль ойида Швеция ҳукумати мамлакатда COVID-19 эпидемиясига қарши амалга оширилган чора-тадбирларни тафтиш қилиш бўйича комиссия тузганди. Комиссия коронавирусга қарши марказий ва маҳаллий ҳукумат томонидан кўрилган чоралар ва шведларнинг чекловларга қай даражада амал қилганини ўрганади. Бундан ташқари, комиссия Швециянинг эпидемияга қарши бошқа мамлакатларга нисбатан қанчалик даражада кураша олганига ҳам баҳо беради.

Жонс Ҳопкинс’да келтирилган 1 сентябрдаги маълумотларга кўра, Швецияда 84 мингдан ортиқ киши коронавирусга чалингани қайд этилган. Уларнинг 5,8 минг нафари вафот этган.